მატჩისშემდგომი მიმოხილვა: გზის გამგრძელებელი

ესეც თქვენი აზორ აჰაი!

16 წლის ვარსკვლავმა კიდევ ერთი ზღაპარი დაწერა, ამჯერად ისე დაწერა რომ თამაშიც მოიგო. პატარა ზღაპრებია ჯერჯერობით, მაგრამ ყველა დიდი ზღაპარი, პატარა შესავალით იწყება. მომდევნო სეზონში ილუსტრაციებსაც ჩაამატებს და მერე იქნებ დიდი რომანიც დაიწეროს. ლიონელ მესის მსგავსად, მესიც ხომ ეგრე იყო? კითხულობდი კითხულობდი და ბოლო არ უჩანდა, საერთოდ არ ჰქონდა დასასრული და ახლაც ასეა, მარადონას მსგავსად მარადისობაში გადაიზარდა. 

ეს გამხდარი ბიჭი კიდევ ახლა იწყებს და რა მაგრად იწყებს. ნელ-ნელა გუნდის ლიდერად ყალიბდება. სულ რაღაც 16 წლის არის, ძალიან საშიში პოტენციალით! აღსანიშნია ის რომ წყალწაღებულ “ბარსელონაში” ახერხებს თავის გამოჩენას, იმ გუნდში, რომელსაც ბევრი არაფერი გამოსდის და თითქოს დაშლის პირასაა. წესით და რიგით, დალაგებულ გუნდში ბევრად დიდი ნაბიჯებით უნდა განვითარდეს. მოკლედ, ახალი ვარსკვლავი ნაპოვნია, ჯერ არ ღირს მისი დამძიმება 10 ნომრიანი მაისურით, მაგრამ დიდი გზის გამგრძელებელი სწორედ ის არის. 

პარალელურად 

ისე მოხდა რომ “ბარსას” და “ნაპოლის” მატჩები ხშირად ემთხვევა ერთმანეთს. პარასკევსაც კი დაემთხვა. ისევ პარალელურად, ორ მონიტორზე მივადევნე თალყური და პირველი რაც თვალში მოხვდებოდა ადამიანს სათამაშო ტემპია. “ნაპოლი” გაცილებით მაღალ ტემპში თამაშობს, უფრო მეტი სიმძლავრე და აგრესია აქვს, უფრო სწრაფად გადადის შეტევაზე, “ბარსა” კიდევ სტატიკურია. 

გასაგებია, რომ ბევრი მნიშვნელოვანი ფეხბურთელი აკლია და “მალიორკასთან” ვიღაც-ვიღაცებმა დაისვენეს კიდეც, მაგრამ ეს სტატიკურობა მაინც მთელი სეზონის სურათია და არა ერთი კონკრეტული მატჩის. ვინც გინდა ის იყოს ძირითადში, “ბარსა” ძალიან ნელია. 

ვერც გამარჯვებისკენ საკმარისი სწრაფვა ვერ დავინახე, მიუხედავად იმისა, რომ “ნაპოლიმ” ვერ მოიგო თავისი შეხვედრა, “ბარსამ” კიდევ სამი ქულა ჩაიწერა, მაინც იტალიელებმა უფრო გამოავლინეს გამარჯვების სურვილი. უფრო ცოცხალი გუნდია და მიუხედავად ბევრი პრობლემისა, ჩანს რომ გუნდში არსებული ატმოსფეროც უკეთესია. 

ამ დანაკლისის ფონზე, როცა ისედაც პრობლემური ნახევარდაცვა საერთოდ მოშლილია, “ბარსა” “ნაპოლისთან” ფავორიტად ვერ ჩაითვლება. ისეთი, თანაბარი თამაში იქნება და დეტალები გადაწყვეტს ყველაფერს. აქით იამალის იმედი გვექნება, იქით კიდევ კვარაცხელია დაფრინავს. 

იამალი vs კვარა 

ორი ახალგაზრდა ვარსკვლავი – ნახეთ რა სასაცილოდ ჟღერს. კვარა იამალზე 7 წლით უფროსია! შვიდი წელი ფეხბურთში ხანდახან მთელ კარიერას უდრის. ორივე ახალი სახეა ევროპულ ფეხბურთში, მაგრამ ეს ასაკობრივი სხვაობა მაინც შოკისმომგვრელად გამოიყურება. კიდევ ერთხელ გვახსენებს რამხელა გზა აქვს ლამინეს გასავლელი. 

რა თქმა უნდა, ახლა კვარა გაცილებით მაღლა დგას. ყველაფერს რომ თავი დავანებოთ ლამინეს ჯერ კიდევ სკოლის მოსწავლის აღნაგობა აქვს, ნებისმიერი ფიზიკურად კარგად მომზადებული მცველი პრობლემებს შეუქმნის, თუმცა, მებრძოლი ბიჭი ჩანს და როგორმე უნდა გადაურჩეს დაზიანებებს, ჭკუით თამაში მართებს, ჯერჯერობით ახერხებს კიდეც, კარგად აზროვნებს და ბურთი რომ არ ეშლება ფაქტია. 

საუკეთესო იყო “მალიორკასთან”, გოლის შეგდების ყველაზე კარგი შანსიც მას ჰქონდა, პირველი მცდელობით ხარიხა შეარხია, ლამაზი გოლი იქნებოდა, მაგრამ მცირედი დააკლდა. ტურიდან ტურამდე ჩანს რომ კარში დარტყმაზე ბევრს ვარჯიშობს. მომდევნო ეპიზოდში კი ყველაფერი იდეალურად დასრულდა, ჩვეულ სტილში წაიღო ბურთი, ერთი მოძრაობით ცენტრში შემოწია და ძალიან რბილად ჩასვა ცხრიანში. დარჩა მეკარე გაღიმებული. 

ვარსკვლავია, აბა რა არის?! 

იქით კიდევ კვარა დაქროდა, ვერა და ვერ გააჩერეს. შორიდანაც ურტყა, თავითაც კარგად მოსინჯა, გოლიც შეაგდო და ალბათ მეტიც უნდა გაეტანა. ვუყურებდი ამ ორ თამაშს და ვფიქრობდი, მომდევნო სეზონში რომ “ბარსას” ფორმა გადაიცვას რა მოხდება-მეთქი.. აქით ლამინე, იქით კვარა.. უფ, გადასარევი! 

მანამდე კიდევ ჩემპიონთა ლიგაზე მოუწევთ თამაში. ისე დალაგდა მერვედფინალები რომ მეოთხედფინალებში ნებისმიერ შემთხვევაში კლასიკური მატჩების ბუმი იქნება. დიდი ამბავია იქ მოხვედრა. გინდა თუ არა, ისტორიის ნაწილი გახდები. უბრალოდ, რამდენად არის “ბარსა” ამისთვის მზად? არ ვიცი. ამ დანაკლისით წარმოუდგენელია მზადყოფნაზე ლაპარაკი.

ლა ლიგა კი ნელ-ნელა მიდის. “მადრიდამდე” ხუთი ქულაა. თამაშით ნაკლები აქვთ და ჯუდ ბელინგემი აკლიათ. თუმცა, მოსაგებს ალბათ მაინც მოიგებენ.