მემფისი დაფრინავს, გრიზმანი უმატებს, თუმცა…

ვინც შორიდან გვაკვირდებოდა და იმედი ჰქონდა, რომ “ბარსა” უკუსვლას განაგრძობდა, მისთვის ცუდი ამბავი გვაქვს, “ლა მასია” წინა სეზონივით გვამარაგებს, აკადემია მთავარი გუნდის გაჭირვების ტალკვესი აღმოჩნდა. ახალგაზრდებმა წინა სეზონში შემოგლიჯეს ძირითადი გუნდის კარი და ისე ჩანს, რომ ამ სეზონშიც წაგვეხმარება ერთი-ორი ფეხბურთელი, კუმანის დამოკიდებულება კი მათთვის დიდი სტიმულის მიმცემია, ყველა “ლა მასიელს” აძლევს შანსს. როგორც მინიმუმ “ბარსას” იმაში მაინც წაადგებიან, რომ ეკონომიკური მდგომარეობა გაიუმჯობესოს, თორემ, ყველა რომ ვერ შეძლებს ადგილის დამკვიდრებას ფაქტია. 

ამ გუნდს აქვს მომავალი, მოსამზადებელი ეტაპის მერე არ ღირს შორსმიმავალი დასკვნების გაკეთება, მაგრამ გუშინაც გამოჩნდა ისეთი ნიუანსები, რომელიც იმედიანად განგაწყობს ადამიანს, მაგალითად, სამივე გოლი ძალიან ლამაზი გამოვიდა, პირველი ჰოლანდიური იყო, დე იონგის ძალიან მაგარი პასი და დეპაის ბრაზილიური მოძრაობები, ყოველთვის შეეძლო ლამაზად თამაში და მომავალ სეზონში წესით ბევრი დასამახსოვრებელი მომენტი უნდა გვაჩუქოს, რაც მთავარია, სათამაშო რიტმში ზის, ამოვარდნილი არ არის, ორი კვირის მოსული კაცი უკვე გუნდის ნაწილია, ჩვენ კი ვიცნობთ ფეხბურთელს, რომელიც წლებია “ბარსაშია” და ვერა და ვერ გახდა გუნდის ნაწილი, თავად სად დარბის და გონება სად აქვს კაცი ვერ გაიგებს. 

მოკლედ, დეპაიმ თავის თამაშით მოლოდინი თავადვე გაზარდა, კუმანი, რომ მაგრად ენდობა ესეც ვიცით, ულაპარაკოდ ძირითადში უნდა მისი გამწესება. ძალიან კარგი შეხვედრა ჰქონდა ანტუან გრიზმანს, მაგრამ ერთი დიდი პრობლემაა, ის გაუგებარი კაცი, რომ არ დამტვრეულიყო ვიცით რაც მოხდებოდა, მაგრამ ტრავმა მიიღო და დიდი ლუკმა გვაქვს გადასაგდები, ეს დიდი ლუკმა კი გრიზმანია, წინა სეზონი სადებიუტოზე უკეთესი ჰქონდა, ახლა ბევრს იმედი აქვს, რომ მესამე სეზონი მეორეზე უკეთესი იქნება, უკვე მრავლად არიან მისი დარჩენის მსურველები, მაგრამ მესი იცდის კონტრაქტის გასახანგრძლივებლად და სწრაფად თუ არ დავცალეთ ხაზინა ვერ მოხდება ეს ამბავი, ცოტა სევდიანი ამბავია გრიზმანის ასეთი კარგი თამაშის ფონზე, მაგრამ ასეა საქმე, სხვაგვარად არ გამოვა, სხვა არც არავინ გვყავს დიდი ფასი რომ გადაიხადონ, უფრო სწორად, გვყავს დე იონგი, პედრი, შტეგენი, მაგრამ ყველა ხელშეუხებელია, იმიტომ, რომ მომავალი “ბარსას” საფუძვლად ითვლებიან, გრიზმანი კი ასეთი არ არის. 

თუ რაიმე სხვა გამოსავალიც მოიძებნა, (რაც ჯერჯერობით ვერ იძებნება) და გრიზმანი დარჩა, ხუთი მაღალი დონის თავდამსხმელი სამი პოზიციისთვის აბსოლუტურად საკმარისი იქნება, პლუს აკადემიის ბიჭები, მათ შორის დემირი, რომელსაც სხვადასხვა პოზიციებზე შეუძლია თამაში და გადასარევი მარცხენა აქვს. 

დეპაი ვნახეთ რა ბიჭია, ახლა აგუერო გვყავს საქმეში სანახავი და ფატისაც უნდა შევავლოთ თვალი, საინტერესოა რა ფორმაში დაუბრუნდება მოედანს, იქნება თუ არა ისევ ისეთი სწრაფი, შეძლებს თუ ვერა ისევ ისე ბურთის კონტროლს და შენარჩუნებას, აჩქარებას და თამაშის გამწვავებას, ამხელა პაუზის მერე დრო დასჭირდება, მაგრამ ნიჭი არსად ქრება, ამას ვერავინ წაართმევს. 

აგუერო წესით და რიგით, მომდევნო მატჩში უნდა ვიხილოთ, ნაადრევად დაიწყო ვარჯიში, ესმის, რომ მარტო მესისთან ძმაკაცობის გამო სასტარტოში არავინ დააყენებს, გრიზმანი თუ დარჩა დიდი ბრძოლა მოუწევს ძირითადისთვის. მისგან ველით გოლებს და არა დაცვაში აქტიურ მუშაობას, არც განსაკუთრებულ ფინტებს, უბრალოდ გოლებს, შორიდანაც ბევრი გაუტანია, მაგრამ საჯარიმოს კაცია, ძალიან კარგი ალღოთი, ზუსტად ასეთი ფორვარდი გვაკლდა წინა სეზონში, ჰოდა, ვნახოთ. 

ნიკო და გავი ისე თამაშობენ ვეინალდუმი აღარც გაგვახსენდება. მაგალითად, წინა მოსამზადებელზე ტრინკაუმ გაიბრწყინა, მაგრამ მთელი სეზონი ჩააგდო, მაგრამ, საპირისპიროც ხომ ვნახეთ? პედრიმ დატოვა ძალიან მაგარი შთაბეჭდილება და იქიდან მოყოლებული აღარც გაჩერებულა, თამაშობს და თამაშობს, გაიხედავ სხვა კონტინენტზე და იქაც ნახევარფინალშია, ევროსი არ იყოს. იმედია ამჯერად ფინალამდეც მივა, საშინლად დატვირთული სეზონი გამოუვიდა, მაგრამ იმხელა გამოცდილება შეიძინა, ამ მოკლე პერიოდში ასე სწრაფად გაზრდილ ფეხბურთელს უბრალოდ ვერ იპოვით. ერთი დიდი ამოსუნთქვა ოლიმპიადის შემდეგ და ყველაფერი დაიწყება ისევ თავიდან. 

გარსიამ ბოლომდე ითამაშა, მინგესამ ტრავმა მიიღო. მესი კი ისევ იცდის, ძალიან უყვარს გამპერის თასზე თამაში, ამიტომ, იმ დროისთვის წესით ბევრი რამ უნდა მოგვარდეს. მოლოდინი კარგი მაქვს, თუმცა, მოლოდინზე მერე, სეზონის დაწყების წინ, ტრადიციულად შემოვაგდებთ ვარაუდებს.