აურზაური მეტოქის ბანაკში!

 L’equipe-ზე მაურისიო პოჩეტინოს მიღწევებს განიხილავენ და სულ მცირე ხანში ელიან, რომ პსჟ-ის მთავარ მწვრთნელად წარადგენენ. პარიზელებმა ტუხელი გაათავისუფლეს და მთავარი კანდიდატი არგენტინელი მწვრთნელია, თუ იმასაც გავითვალისწინებთ, რომ ოლე გუნარ სულშერმა მნიშვნელოვნად გაიმყარა პოზიციები, ალბათ მის გადაყენებას არ იჩქარებენ და არც მაურისიოს ექნება იმედი, რომ „მანჩესტერში“ დანიშნავენ, ამიტომ ფრანგული ვარიანტი რეალურია.

პოჩეტინო პსჟ-სთვის უცხო არ არის, რადგან უთამაშია ამ კლუბში და უცხო არ არის ჩვენთვის, რადგან მისი კარიერის თითქმის ყველა ეტაპზე გადავეყარეთ ერთმანეთს. არგენტინული ხასიათი აქვს, რაღაცით დიეგო სიმეონეს წააგავს და მისი ფეხბურთიც მეტწილად მსგავსია, პოჩეს გუნდები აგრესიულ და კარგად ორგანიზებულ ფეხბურთს თამაშობენ.

ტუხელისგან აბსოლუტურად განსხვავებული ტიპის მწვრთნელია, ამიტომ ცვლილებამ წესით და რიგით, პსჟ-ზე კარგად არ უნდა იმოქმედოს, სანამ ახალი მწვრთნელი თავის მეთოდებს დანერგავს და გუნდს თავის ჭკუაზე აათამაშებს, მანამდე მერვედფინალიც მოახლოვდება. თუ ეს მწვრთნელი პოჩეტინო იქნება, უფრო გართულდება ახალ სტილზე გადასვლა.

ტუხელი არ მიიჩნიეს იმ რანგის მწვრთნელად, რომ „ბარსასთან“ შეხვედრა ანდონ. წინა სეზონში ფრანგებს გაუმართლათ და ფინალამდე ია-ვარდით მოფენილ გზაზე იარეს. მიუხედავად მარტივი ბადისა, მაინც მძიმე ბრძოლაში დაამარცხეს „დორტმუნდი“, „ატალანტა“ და „ლაიფციგი“. ამჯერად მათი მეტოქე გრანდია, თანაც ის გუნდი, რომელთან მტრობაც დიდი ხანია გრძელდება, „ბარსელონასა“ და პსჟ-ს შორის ურთიერთობა ჯერ კიდევ მაშინ დაიძაბა, როცა ვერატიმ „ბარსა“ უბრალოდ ხელფასის მოსამატებლად გამოიყენა. ამას მოჰყვა ყველაზე დასამახსოვრებელი შეხვედრა, რომელსაც არაბი შეიხი ალბათ ვერასდროს დაივიწყებს და ერთგვარი შურისძიება სეზონის ბოლოს – ნეიმარის ტრანსფერი.

ბრაზილიელის დაბრუნებაზე ყოველ წელს მიდის საუბარი, ყოველ წელს ხვდებიან ხელმძღვანელები და განიხილავენ ვარიანტებს, მაგრამ შეთანხმება ვერ ხერხდება.

ერთი სიტყვით, ჩვენს დროში, „ბარსა“ და პსჟ ძალიან გამაღიზიანებელი გუნდები არიან ერთმანეთისთვის, ამიტომ ეს თამაში უფრო მეტია, ვიდრე უბრალოდ მერვედფინალი.

პოჩეტინოს ცენტრალური შეხვედრების მოგება შეუძლია. პრემიერ ლიგაში მწვრთნელები სწრაფად იზრდებიან, რადგან ყოველი მეორე ტური ცენტრალურია, პოჩემ „ტოტენჰემში“ დიდი სახელი დატოვა, ლიგის ფინალიც კი ითამაშა! პირველი თამაშების მერე, თითქოს „ბარსას“ და „აიაქსის“ საოცნებო ფინალი უნდა გვენახა, მაგრამ ყველაფერი თავდაყირა დადგა და უსახური ინგლისური ფინალი ვიხილეთ.

თუმცა, ინგლისელებმა ფინალი დაიმსახურეს.

ფინალამდე „ბარსა“ „ტოტენჰემს“ ჯგუფურ ეტაპზე შეხვდა, გასვლაზე 4:2 მოვიგეთ, სახლში 1:1 ვითამაშეთ.

მას შემდეგ რაც პოჩეტინო გაათავისუფლეს, „ბარსას“ მწვრთნელადაც განიხილავდნენ, მაგრამ ეს ყველაფერი ესპანური გამოცემების გვერდებს არ გასცილებია.

რა მოხდება ამას სულ მცირე ხანში ვნახავთ. მანამდე კი დანამდვილებით შეგვიძლია იმის თქმა, რომ მერვედფინალში განსხვავებულ პსჟ-ს ვიხილავთ.