ჟოან ლაპორტას რჩეული

ნიკო უილიამსის მიერ “ბარსელონას” უარის თქმითა და “ბილბაოში” დარჩენამ კატალონიელები საწყის ეტაპზე დააბრუნა მარცხენა ფლანგის გაძლიერების მცდელობებში. ალტერნატიულ ვარიანტებად დასახელდა ლუის დიასი და მარკუს რაშფორდი, თუმცა ახალ სახელად წამოიჭრა რაფაელ ლეაუ – ფეხბურთელი, რომელსაც დიდი ხანია ჟოან ლაპორტა აქტიურად ლობირებს.

რაფაელ ლეაუ – ხელმისაწვდომი მიზანი ზაფხულის სატრანსფერო ფანჯარაში

პორტუგალიელ ვინგერს წარსულში არაერთხელ დაუკავშირეს “ბარსელონა”, მაგრამ ტრანსფერი ჯერ ვერ შედგა. ახლა კი, “მილანი” მზად არის მისი გაყიდვისთვის და Sport-ის ცნობით, €70 მილიონად შეუძლია მისი შეძენა ნებისმიერ კლუბს. მიზეზი ფასის დაკლებისა არის ბოლოდროინდელი ფორმის ვარდნა – ბოლო 12–18 თვეში ლეაუ ვერ იჩენდა იმ დონეს, რაც ადრე გამოარჩევდა, თუმცა ეს “ბარსელონასთვის” შესაძლო შანსს ქმნის, მაგრამ ამასთანავე კონკურენციაც არსებობს: “ბაიერნი” და “ჩელსი” პოტენციური მყიდველები არიან.

ჟოან ლაპორტა ლეაუს აქტიური მხარდამჭერია

მიუხედავად იმისა, რომ სპორტული დირექტორი დეკუ ამ ეტაპზე ლუის დიასს ანიჭებს უპირატესობას და მის ტრანსფერზე მუშაობს, კლუბში არსებობს ფიგურა, რომელიც ლეაუს ვარიანტს ხელს უწყობს და ეს არის პრეზიდენტი ჟოან ლაპორტა. ლეაუ დიდი ხანია ლაპორტას საყვარელ ფეხბურთელად ითვლება და თუ პრეზიდენტი მოითხოვს და თუ შესაძლებელი იქნება, “ბარსა” ტრანსფერზე მუშაობას განაახლებს ზაფხულის მეორე ნახევარში, განსაკუთრებით იმ შემთხვევაში, თუ “ლივერპული” დიასის გაყიდვაზე კვლავ უარს იტყვის.

ლეაუ – სტილისტურად ყველაზე ახლოს ნიკო უილიამსთან

თუ ლეაუს, დიასსა და რაშფორდს ერთმანეთს შევადარებთ, სტილისტურად ლეაუ ყველაზე მეტად ჰგავს ნიკო უილიამსს – ის ფლანგზე თამაშობს, ძლიერია სივრცის ეფექტურად ათვისებაში, სწრაფია და ტექნიკური. €70 მილიონის გადახდა, თუ ის “მილანში” ნაჩვენებ პიკურ ფორმას დაიბრუნებს, შესაძლოა საბოლოოდ იაფიც აღმოჩნდეს, თუმცა ამ ეტაპზე, “ბარსელონა” მის ტრანსფერზე აქტიურად არ მუშაობს, სანამ ლუის დიასის ვარიანტი კვლავ განხილვადია.