ბარსელონამ ვიტორ როკეს ტრანსფერის ბონუსი დაკარგა

“ბარსელონამ” “პალმეირასისა” და ვიტორ როკეს ფიფას საკლუბო მსოფლიო ჩემპიონატზე გამოსვლას განსაკუთრებული ინტერესით ადევნა თვალი – ტურნირზე ბრაზილიური გუნდის წარმატებას კატალონიელებისთვის ფინანსური სარგებელიც უნდა მოეტანა, თუმცა გეგმები ჩაეშალა.

“პალმეირასის” შეჩერებული გზა და დაკარგული ბონუსი

“პალმეირასმა” ჯგუფური ეტაპი პირველ ადგილზე დაასრულა და მეოთხედფინალში გვიდა – ჯგუფში მეორე ადგილი ლიონელ მესის “ინტერ მაიამიმ” დაიკავა. ბრაზილიურმა გუნდმა მერვედფინალში ძველ მეტოქე “ბოტაფოგოს” დამატებით დროში სძლია, თუმცა შემდეგ ეტაპზე “ჩელსისთან” 1:2 მარცხმა მათი გზა ტურნირზე დაასრულა. მიუხედავად იმისა, რომ “პალმეირასი” ფინანსურ სარგებელს მაინც მიიღებს ტურნირიდან, “ბარსელონა” €2 მილიონიან ბონუსს გამოეთხოვა, რომელიც ვიტორ როკეს გამოსვლაზე იყო მიბმული.

ტრანსფერის დეტალები: გაყიდული იყო მხოლოდ 80% უფლება და ბონუსები შესრულებაზე იყო დამოკიდებული

“ბარსელონამ” და ვიტორ როკემ 2025 წლის თებერვალში ურთიერთობა ოფიციალურად დაასრულეს, მას შემდეგ, რაც 20 წლის ბრაზილიელმა ვერ გაამართლა მოლოდინი და ვერ შეძლო თავის დამკვიდრება. მისი ტრანსფერი “პალმეირასში” ბრაზილიური ფეხბურთის რეკორდულ ფასად – €25.5 მილიონად განხორციელდა, თუმცა გარიგება ითვალისწინებდა მხოლოდ უფლებების 80%-ს. დანარჩენი 20% და დამატებითი €5 მილიონი ბონუსებად უნდა გადახდილიყო მიღწეული შედეგების მიხედვით.

ბონუსების ჩამონათვალში შედიოდა:

• €1M – საერთაშორისო ტურნირის მოგებისთვის

• €2M – თუ ფეხბურთელი “ოქროს ბურთს” მოიგებდა

• €2M – თუ ის ფიფას საკლუბო მსოფლიო ჩემპიონატზე სამ საუკეთესო მოთამაშეს შორის მოხვდებოდა

სწორედ ამ ბოლო კრიტერიუმით გათვალისწინებული ბონუსი განულდა: როკემ ტურნირზე გოლი ვერ გაიტანა და მისი თამაშიც არ შეაფასეს მაღალი ნიშნით. შედეგად, “ბარსელონამ” €2 მილიონი დაკარგა.

გართულებული ისტორია კატალონიაში

ვიტორ როკესა და “ბარსელონას” ურთიერთობა თავიდანვე რთული იყო. 2023 წელს დიდი მოლოდინებით გადმოსული თავდამსხმელი მალევე გაუშვეს იჯარით “ბეტისში”, სადაც ასევე ვერ მოახერხა თავის გამოჩენა. საბოლოოდ, ჰანსი ფლიკმა მას არ დაუთმო ადგილი თავის გეგმებში, რის შემდეგაც ფეხბურთელმა უკმაყოფილება არაერთხელ გამოთქვა საჯაროდაც.