ჩემპიონობა და თითქმის ჩემპიონობა ერთ დღეში

გუშინ “ბარსელონასთვის” ძალიან კარგი დღე იყო. მნიშვნელოვანი გამარჯვება მოიპოვა “ბლაუგრანას” როგორც კაცების, ასევე ქალების გუნდმა.

“ბარსას” ქალების გუნდი მორიგ ტრებლს კიდევ ერთი ნაბიჯით მიუახლოვდა. პერე რომეუს ფეხბურთელებმა “ბეტისი” სტუმრად 9-0 გაანადგურეს და ესპანეთის ჩემპიონობა ოფიციალურად გაინაღდეს, ზედიზედ მეექვსედ, სულ კი მეათედ.

“ბარსელონას” ქალთა გუნდს 2 მნიშვნელოვანი თამაში აქვს დარჩენილი – 24 მაისს ჩემპიონთა ლიგის ფინალი “არსენალთან” და 7 ივნისს ესპანეთის თასის ფინალი “ატლეტიკოსთან”. “ბლაუგრანა” ორივე მატჩში ფავორიტია და მათი მოგების შემთხვევაში ტრებლს ისტორიაში მესამედ, ხოლო ზედიზედ მეორედ შეასრულებს.

გუშინვე ჩემპიონობა თითქმის გაინაღდა “ბარსას” კაცების გუნდმაც. ჰანსი ფლიკის შეგირდებმა კონკურენტი “რეალ მადრიდი” 4-3 დაამარცხეს და ლა ლიგის დასრულებამდე 3 ტურით ადრე 7-ქულიანი უპირატესობა შეიქმნეს. ეს ნიშნავს, რომ დარჩენილ 3 შეხვედრაში 2 ქულის აღების შემთხვევაში “ბლაუგრანა” ოფიციალურად გაჩემპიონდება.