როდის დაბრუნდება რობერტ ლევანდოვსკი?

“ბარსელონა” გადატვირთულ კალენდარს გუნდის საუკეთესო ბომბარდირის, რობერტ ლევანდოვსკის გარეშე უმკლავდება. “ბლაუგრანას” გამოცდილი პოლონელი თავდამსხმელი კიდევ რამდენიმე მატჩში არ ეყოლება.

ლევანდოვსკიმ ტრავმა 19 აპრილს “სელტასთან” თამაშში (4-3) მიიღო, რის გამოც მან “მალიორკასთან” და “რეალ მადრიდთან” გამართული შეხვედრები უკვე გამოტოვა. ჯერჯერობით ცნობილი არაა, კიდევ რა დრო დასჭირდება 36 წლის შემტევის გამოჯანმრთელებას.

პოლონური Meczyki-ს ინფორმაციით, ლევანდოვსკის მკურნალობის პროგრესის შესაფასებლად და დაბრუნების სავარაუდო თარიღის განსასაზღვრად დამატებითი სამედიცინო შემოწმება ჩაუტარდება.

ცნობილია, რომ რობერტი ხვალ “ინტერთან” ჩემპიონთა ლიგის ნახევარფინალის პირველ მატჩში არ იქნება. მეტიც – AS იუწყება, რომ ლევანდოვსკის “ვალიადოლიდთან” და “ინტერთან” განმეორებითი თამაშის გამოტოვებაც მოუწევს.

“ბარსელონაში” იმედოვნებენ, რომ რობერტ ლევანდოვსკი 11 მაისს გასამართი “ელ კლასიკოსთვის” მზად იქნება.