ლევანდოვსკიმ, შესაძლოა, სეუტასთან ითამაშოს

“ბარსელონას” ლიდერი რობერტ ლევანდოვსკი, დიდი შანსია, ესპანეთის თასის 1/8-ფინალში “სეუტას” წინააღმდეგ ვიხილოთ.

“სეუტა” ესპანეთის ჩემპიონატის მე-3 ლიგაში თამაშობს. ასეთი დონის გუნდებთან “ბარსელონა” ლიდერებს ასვენებს ხოლმე და დიდი ალბათობით, ასე მოხდება ხვალაც, მაგრამ რობერტ ლევანდოვსკის შემთხვევა გამორჩეულია.

პოლონელს ლა ლიგაში 3-მატჩიანი დისკვალიფიკაცია ჰქონდა, საიდანაც ჯერ მხოლოდ ერთი მოიხადა. ეს ნიშნავს, რომ ლევანდოვსკი ესპანეთის ჩემპიონატის მომდევნო ორ შეხვედრაშიც ვერ ითამაშებს.

Mundo Deportivo-ს ცნობით, იმისათვის, რომ “ბარსას” ცხრიანი სათამაშო პრაქტიკის გარეშე არ დარჩეს, მას დიდი ალბათობით “სეუტასთან” ხვალ გასამართ შეხვედრაში ვიხილავთ.

ხელისშემშლელი ფაქტორი, შესაძლოა, ნეკნების არეში არსებული დაზიანება იყოს. შეამჩნევდით, ესპანეთის სუპერ თასის ფინალში “რეალ მადრიდთან” გამართული თამაშის დროს ლევანდოვსკი ნეკნს იტკივებდა.