უმტიტის იტალიური ფეხბურთის შესწავლა სურს, რადგან ის მწვრთნელობას აპირებს

ცნობილი იტალიელი ჟურნალისტი ჯანლუკა დი მარციო სამუელ უმტიტის “ლეჩეში” სავარაუდო გადასვლასთან დაკავშირებით დეტალურ ინფორმაციას ავრცელებს.

დი მარციოს ცნობით საუბარია უბრალო იჯარაზე, რომლის დროსაც ფეხბურთელის ხელფასს “ბარსელონა” გადაიხდის, “ლეჩეს” კი თანხის გადახდა მხოლოდ იმ შემთხვევაში მოუწევს, თუ სამუელი გარკვეული რაოდენობის შეხვედრებში მიიღებს მონაწილეობას. დი მარციო ცოტა ხნის წინ გავრცელებულ ინფორმაციას ადასტურებს.

იტალიელი ჟურნალისტის თქმით, უმტიტის წლიური ანაზღაურება გადასახადების ჩათვლით 20 მილიონი ევროა. აქ დი მარციო ცდება. ფრანგმა რამდენიმე თვის წინ ეს ხელფასი მთელ კონტრაქტზე გადაინაწილა და ახლა “ბარსას” მისთვის დაახლოებით 20 მილიონი ნამდვილად აქვს გადასახდელი, მაგრამ 2026 წლამდე, ანუ წელიწადში დაახლოებით 5 მილიონი ევრო.

დი მარციოს მიერ გავრცელებული ინფორმაციის ყველაზე საინტერესო ნაწილი კი ის მიზეზია, რატომაც 28 წლის ფრანგმა მცველმა იტალიაში გადასვლა გადაწყვიტა. თურმე უმტიტის მომავალში მწვრთნელობა აქვს ჩაფიქრებული. მას სურს, იტალიური ფეხბურთი და ტაქტიკა შეისწავლოს.

უმტიტი იტალიაში პირადი მწვრთნელით ჩავა, რომელიც ფეხბურთელს კუნთოვანი მასის განვითარებასა და ტრავმების თავიდან აცილებაში დაეხმარება.