რობერტ ლევანდოვსკი ბარსელონას უახლოვდება

ივან სან ანტონიოს ცნობით, რობერტ ლევანდოვსკი “ბარსელონას” უახლოვდება – ფეხბურთელის გარემოცვა დარწმუნებულია, რომ ტრანსფერი ამ კვირაში დაიხურება.

წყაროს ინფორმაციით, ამ მომენტისთვის, პოლონელი თავდამსხმელი “ბარსაში” გადასვლასთან ისე ახლოსაა, როგორც არასდროს – “ბაიერნი” მზადაა, იგი 50 მილიონ ევროდ (გერმანელებს ეს თანხა ფიქსირებულად სურთ) დათმოს.

ბოლო საათებში რაღაცები შეიცვალა, რამაც ტრანსფერი კიდევ უფრო რეალური გახადა. რობერტთან დაახლოებული პირები ახლა ბევრად ოპტიმისტურად არიან განწყობილნი. 

მატეუშ ბორეკის თანახმად, შეთავაზება, რომელზეც ჟოან ლაპორტა ანდრეას კრისტენსენის პრესკონფერენციის დროს საუბრობდა, უკვე გაგზავნილია – ფიქსირებული 50 მილიონი ევრო.

პოლონელი ხვალ ვარჯიშს დაუბრუნდება, 2-3 დღეში კი შეხვედრას მოაწყობს და თავის ამჟამინდელ თანაგუნდელებს დაემშვიდობება. ახლა, ფეხბურთელი მიუნხენშია, მაგრამ, აღსანიშნავია, რომ მისი ცოლი – ანა ლევანდოვსკა ესპანეთში დარჩა.

აღნიშნულ ცნობებს Mundo Deportivo-ც ადასტურებს და იუწყება, რომ გარიგების ამ კვირაში დასრულების კატალონიურ კლუბშიც სჯერათ.

როგორც BILD წერს, “ბაიერნში” ყველას მიაჩნია, რომ ლევანდოვსკიმ კლუბი უკვე დატოვა. გერმანული გუნდის თავკაცმა იულიან ნაგელსმანმა და მოთამაშეებმა არ იციან, მას როგორ დახვდნენ. რობერტს “რეკორდმაისტერთან” დაპირისპირება არ სურს და იმედოვნებს, რომ “ბლაუგრანა” მის შეძენას რამდენიმე დღეში შეძლებს.

ლევანდოვსკი “ბარსელონასთან” 3+1-წლიან კონტრაქტს გააფორმებს.