გადამწყვეტი კვირა რაფინიას ბარსაში ტრანსფერისთვის; ლიდსმა ბრაზილიელის შემცვლელი იპოვა

დღეს “ბარსელონამ” ფრანკ კესიესა და ანდრეას კრისტენსენის ტრანსფერები ოფიციალურად დაადასტურა – შემდეგი სამიზნეები რაფინია და რობერტ ლევანდოვსკი არიან. 

ჟურნალისტ ბენ ჯეიკობსის ინფორმაციით, “ბარსა” ბრაზილიელი შემტევის თაობაზე “ლიდსთან” მოლაპარაკებებს ამ კვირაშიც გამართავს. ჟოან ლაპროტას შეთანხმების მისაღწევად დედლაინი არ დაუწესებია, მაგრამ თავად ინგლისური კლუბი მიიჩნევს, რომ მიმდინარე კვირა გადამწყვეტი იქნება, განსაკუთრებით მას შემდეგ, რაც ისინი “ფეიენოორდიდან” კოლუმბიელი ფეხბურთელის, ლუის სინისტერას გადაბირებასთან ახლოს არიან.

ადრე გავრცელებული ცნობებით, “ჩელსი” რაფინიას დასარწმუნებლად ყველაფერს აკეთებს, მაგრამ ბრაზილიელი და მისი აგენტი დეკუ მხოლოდ “ბარსელონაზე” ფიქრობენ, რაც ლონდონელებმა კარგად იციან. “ლურჯების” სტრატეგია ყოველთვის მოლაპარაკებების დაჩქარება იყო და “ლიდს იუნაიტედთან” შეთანხმებაც აქვთ, მაგრამ საქმეს ფეხბურთელის სურვილი ურთულებთ.

რაფინია ამჟამად იბიცაზე იმყოფება და “ბარსელონასა” და “ლიდსის” შეთანხმებას ელოდება.