ბარსელონა ლევანდოვსკის 4 წლიან კონტრაქტს სთავაზობს

რობერტ ლევანდოვსკის “ბარსელონას” მაისურით ხილვა უფრო და უფრო რეალისტური ხდება.

Sport-ის ცნობით “ბარსელონაში” აცნობიერებენ, რომ ერლინგ ჰოლანდის შეძენა რთული იქნება და კატალონიური გუნდი ალტერნატიულ ვარიანტებზე მუშაობს, ერთ-ერთი მთავარი სამიზნე კი ლევანდოვსკია.

33 წლის პოლონელის გერმანული კარიერა დასასრულს უახლოვდება. გავრცელებული ინფორმაციით ვეტერან ვარსკვლავს ძალების სხვა ქვეყანაში მოსინჯვა სურს და ის “ბლაუგრანაში” თამაშზე თანახმაა.

ლაპორტა ხვდება, რომ მის გუნდს ვარსკვლავი ჭირდება, რომელიც კლუბს არა მხოლოდ მოედანზე, არამედ მარკეტინგშიც დაეხმარება. ჩავის კი ჭირება სუპერ თავდამსხმელი, რომელიც ახალგაზრდა ნახევარმცველების დაწყებულ საქმეს წარმატებით დაასრულებს.

Sport-ის ცნობით “ბარსა” ლევანდოვსკის 4 წლიან კონტრაქტს სთავაზობს. ამ ამბავში ერთი უცნაურობაა – გაპრეზიდენტების შემდეგ ლაპორტამ მისი წინამორბედი ჟოზეპ მარია ბართომეუ იმის გამო გააკრიტიკა, რომ მის დროს კლუბი ახალგაზრდებთან ხანმოკლე, ხოლო ხანშიშესულ ფეხბურთელებთან ხანგრძლივ კონტრაქტებს აფორმებდა. ამის გათვალისწინებით “ბარსელონას” მხრიდან ლევანდოვსკისთვის 4 წლიანი ხელშეკრულების შეთავაზება უცნაურია. თუმცა კლუბში ფიქრობენ, რომ პოლონელი უმაღლეს დონეზე კიდევ მინიმუმ 2 წელს ითამაშებს, ხოლო საქმისადმი მისი დამოკიდებულების გამო მას ამ პერიოდის კიდევ 2 წლით გახანგრძლივება შეუძლია. “ბლაუგრანას” ამ პოზიციას ფეხბურთელის სტატისტიკაც ამყარებს – უკვე 7 წელია, ლევანდოვსკის სეზონში მინიმუმ 40 გოლი გააქვს, 30 წელს მიღწევის შემდეგ კი მან 55, 48 და ამ სეზონში უკვე 45 გოლის გატანა მოახერხა. აშკარაა, პოლონელი ტემპის დაგდებას ჯერ არ აპირებს.

რობერტ ლევანდოვსკის ერთ-ერთ დადებით თვისებად ასევე ფასდება მისი მაღალი დონის პროფესიონალიზმი. პოლონელი კლუბისთვის პრობლემას არასდროს ქმნის.

ლევანდოვსკის “ბაიერნთან” კონტრაქტი 2023 წლამდე აკავშირებს. ამის გათვალისწინებით “ბარსელონას” მისი ტრანსფერი ძვირი არ დაუჯდება.