“ბარსას” რთული არჩევანი: დეპაი თუ აგუერო

Marca-მ “ბარსას” მომდევნო თავსატეხს სტატია მიუძღვნა.

ოფიციალურად დადასტურდა, რომ აგუერო “სიტის” დატოვებს, არავისთვის არის დასამალი, რომ არგენტინელს “ბარსელონაში” თამაში სურს და არც “ბარსა” მალავს ინტერესს, მაგრამ ტრანსფერის განხორციელება რამდენიმე მიზეზის გამო, რთული იქნება. აგუერო ჯერ არ ჩამოყალიბებულა მომავალზე, მაგრამ უკვე კონკურენციაშია მემფის დეპაისთან, ორივე თავისუფალი აგენტი ხდება და დაახლოებით ერთი სიდიდის ხელფასი ექნებათ, აგუერო ამჟამად გაცილებით მეტს იღებს, მაგრამ ნაკლებ ხელფასზე თანახმაა. 

“ბარსას” 2005 წლის შემდეგ (ლაპორტას პრეზიდენტობის პერიოდი), თავისუფალი აგენტის სტატუსით ფეხბურთელი არ გადაუბირებია, ამჟამად კი ამის შესაძლებლობა ძალიან დიდია – ან დეპაი, ან აგუერო.

მემფის დეპაი

წესით და რიგით მისი ტრანსფერისთვის ხელი ვერაფერს უნდა შეეშალა, მაგრამ ხელმძღვანელობა შეიცვალა და ლაპორტამ “პრეზიდენტის წესი” განსაზღვრა, ანუ, კუმანს მოუსმენს, მაგრამ საბოლოო გადაწყვეტილებას თავად მიიღებს. დეპაი რონალდ კუმანის ერთ-ერთი მთავარი მოთხოვნა იყო, მაგრამ ბართომეუმ ვერც მის გადმოყვანას მოაბა თავი, მიუხედავად იმისა, რომ დეპაის ფასი, კონტრაქტიდან გამომდინარე, ძალიან დაბალი იყო. 

კუმანს მცდელობა ჰქონდა, რომ ზამთარში მაინც მიეღწია საწადელისთვის, მით უმეტეს, რომ ფატი და კოუტინიო დაშავდნენ, მაგრამ ზამთარშიც ხელცარიელი დარჩა, ამჯერად, ზაფხულში ეცდება, რომ დეპაი გადმოიყვანოს, ფაქტია, რომ თავად კუმანს მემფისის კანდიდატურა აგუეროზე მეტად მოსწონს, მაგრამ არგენტინელსაც გავლენიანი ხალხი უჭერს მხარს. 

დეპაის უპირატესობები:

• კუმანი ჰოლანდიის ნაკრებში, ცრუ ცხრიანის, ხანდახან კი ფორვარდის პოზიციაზე იყენებდა, დეპაი კი ტიპური გარემარბია, რომელსაც ორივე ფლანგზე შეუძლია თამაში, გამოდის, რომ კუმანის ხელში, შეტევის ყველა პოზიციაზე შეძლებს თამაშს, ეს აგუეროს ნამდვილად არ შეუძლია. 
• რონალდ კუმანის ფაქტორი ძალიან მნიშვნელოვანია, რადგან ჰოლანდიელი ფეხბურთელს ითხოვს, ესე იგი, ზუსტად ხედავს მის როლს გუნდში და დანამდვილებით იცის რა შეუძლია. 
• დეპაის გაცლებით კარგი სეზონი აქვს, წინა სეზონში მიღებული მძიმე ტრავმის შემდეგ ფორმა მარტივად აღიდგინა, აგუეროს რაც შეეხება, უკვე ძალიან დიდი ხანია ტრავმის გარეშე სეზონი არ ჩაუტარებია და აღარც ასაკი აქვს ისეთი, რომ მისგან მომატებას ველოდოთ. 

სერხიო აგუერო

აგუეროზე ყოველთვის იყო საუბარი, როგორც “რეალის” ისე “ბარსას” შემთხვევაში, “ბარსა” გამოირიცხა იმიტომ, რომ მესი დიდი ხნის განმავლობაში ფორვარდად თამაშობდა და გვერდით არავინ სჭირდებოდა, შემდეგ კი არჩევანი ლუის სუარესზე გაკეთდა, ახლა “ბარსას” ფორვარდი სჭირდება, რადგან აღარც სუარესია გუნდში და მესის როლიც შეიცვალა.

აგუეროს უპირატესობები:

• ძალიან დიდი დრო გავიდა, მაგრამ აგუერო კარგად იცნობს ლა ლიგას, საქმე დროში არ არის, საქმე თამაშის ხასიათშია, არგენტინელი თავიდან ბოლომდე ადაპტირებული იყო ესპანურ ფეხბურთთან და ინგლისში არაფერი დაუკარგავს, პირიქით, რამდენიმე კარგი თვისება შეიძინა. 
• აგუერო უნივერსალი არ არის, მაგრამ “ბარსას” ზუსტად ცხრიანი სჭირდება, გოლის შემგდები ფეხბურთელი, თუ ჰოლანდის ტრანსფერი ჩაიშალა, აგუეროს ალტერნატივა არ ეყოლება, რადგან გარანტირებულად შეიძლება იმის თქმა, რომ სეზონში მინიმუმ 20 გოლს გაიტანს, თუ მძიმე ტრავმა არ მიიღი. 
• ძალიან მნიშვნელოვანია მესის ფაქტორი, აგუერო და ლეო დიდი ხანია მეგობრობენ, არგენტინელს ახლობელი ადამიანი სჭირდება გუნდში, ჯერ მასკერანო წავიდა, მერე ნეიმარი, ბოლოს სუარესი, ლეომ ცოტა მოიწყინა, აგუეროს გადმობირებით მის წასვლაზე სპეკულაციებსაც წერტილი დაესმება. 

და ბოლოს, მოდი ვთქვათ პირდაპირ, აგუერო უმაღლესი კლასის ფეხბურთელია, მისი დონისთვის ჯერ არც დეპაის მიუღწევია და არც დემბელეს, გრიზმანზე კი უკვე შეგვიძლია ვთქვათ, რომ ვეღარც მიაღწევს.