“სევილიასთან” თამაშის მსაჯი ცნობილია | სტატისტიკა

ცოტა ხნის წინ “სევილიასა” და “ბარსელონას” შორის ესპანეთის თასის 1/2 ფინალში გასამართი პირველი დაპირისპირების მსაჯების ვინაობა გახდა ცნობილი.

მთავარი მსაჯი

10 თებერვალს სევილიაში გასამართი შეხვედრის მთავარი არბიტრი ანტონიო მატეუ ლაოსი იქნება.

43 წლის მსაჯს “ბარსელონას” შეხვედრაში მონაწილეობა 41-ჯერ მიუღია. კატალონიელებს 29 მოგება (71%), 8 ფრე (20%) და 4 წაგება (9%) აქვთ. ვალენსიელმა “ბარსელონას” თამაშში 15 წითელი ბარათი აჩვენა, აქედან 6-ჯერ მოედნიდან “ბლაუგრანას” მოთამაშე გააძევა. სწორედ მან გააგდო ერთ შეხვედრაში მოედნიდან რონალდ არაუხო და უსმან დემბელე და ეს სწორედ “სევილიასთან” მოხდა. ლაოსის მიერ “ბარსელონას” შეხვედრაში დანიშნული 7 თერთმეტმეტრიანიდან 6 კატალონიელებმა შეასრულეს, ერთი კი მეტოქემ.

“სევილიას” მატეუ ლაოსის მიერ განსჯილ 33 თამაშში 17 (52%) მოგება, 3 (9%) ფრე და 13 (39%) მარცხი დაუგროვდა. ანდალუსიელებმა 3 წითელი ბარათი მიიღეს, მეტოქემ – 6. “სევილიას” სასარგებლოდ ლაოსმა 2 პენალტი დანიშნა, ხოლო საწინააღმდეგოდ – 8.

უშუალოდ ამ გუნდების შეხვედრაში ლაოსმა 3-ჯერ იმსაჯა, სამივე უხვგოლიანი შეხვედრა გამოდგა და სამივე შემთხვევაში გამარჯვებული “ბარსელონა” დარჩა. ჯერ იყო 2012 წელს სევილიაში გამართული მატჩი, რომელსაც მასპინძლები 48-ე წუთზე 2-0 იგებდნენ, 89-ე წუთზე კი 2-1, მაგრამ 73-ე წუთიდან 10 კაცით მოთამაშე ანდალუსიელებმა 2-3 წააგეს. ლაოსმა იმ შეხვედრაში მოედნიდან გარი მედელი გააძევა, რომელსაც პირდაპირ წითელი ბარათი უჩვენა.

შემდეგ იყო ისევ სევილიაში გამართული მატჩი, რომელშიც მასპინძლები 2-ჯერ იგებდნენ, მაგრამ საბოლოოდ “ბარსამ” იმარჯვა, ანგარიშით 4-2.

ამ გუნდების ჯერჯერობით ბოლო შეხვედრა, რომელშც ლაოსმა იმსაჯა, 2019 წლით თარიღდება. “ბლაუგრანამ” “კამპ ნოუზე” 4-0 მოიგო. შეხვედრის მიწურულს, როდესაც საბოლოო ანგარიში უკვე დაფიქსირებული იყო, მატეუმ მეოდნიდან ჯერ დებიუტანტი რონალდ არაუხო, რამდენიმე წამში კი უსმან დემბელე გააძევა.

საინტერესოა, რომ ამ ორ გუნდს შორის ჩატარებულ 3 შეხვედრაში 15 გოლი გავიდა და არცერთი თერთმეტმეტრიანიდან.

ვიდეორეფერი

ვიდეორეფერის ოთახიდან ლაოსს იგნასიო იგლესიას ვილანუევა დაეხმარება. “ბარსელონას” მასთან კიდევ უფრო კარგი შედეგი აქვს.

ვილანუევას მონაწილეობით გამართული 17 თამაშიდან “ბლაუგრანამ” 13 მოიგო (76%), 3 ფრედ დაასრულა (18%) და მხოლოდ 1 დათმო (6%). მას კატალონიელთა მოთამაშისთვის წითელი ბარათი არასდროს უჩვენებია, მეტოქე კი მოედნიდან 4-ჯერ გააძევა. დანიშნული 8 თერთმეტმეტრიანიდან 6 “ბლაუგრანამ” შეასრულა, ხოლო 2 მეტოქემ.

“სევილიამ” იგნასიო იგლესიასის მიერ განსჯილი 20 დაპირისპირებიდან 10 მოიგო (50%), 6 ფრედ ითამაშა (30%) და 4 დათმო (20%). ვილანუევამ სულ 8 წითელი ბარათი აჩვენა, აქედან 6-ჯერ მოედნიდან სევილიელთა მოთამაშე გააძევა. 5 თერთმეტმეტრიანდიან კი 3 ანდალუსიელთა კარში დაინიშნა.