ბარსელონა-სოსიედადი – მატჩისწინა მიმოხილვა

24 მოგება – ასეთია “ბარსელონას” შედეგი “რეალ სოსიედადთან” “კამპ ნოუზე” გამართულ ბოლო 24 თამაშში. როგორ შეიძლება ასეთი მაჩვენებლის ფონზე ერთი გუნდი გამოკვეთილი ფავორიტი არ იყოს? თურმე, შეიძლება.

“სოსიედადი” ლა ლიგის ლიდერია, “ბარსელონა” კი ევროსაგზურის ზონის მიჯნაზეა – მე-8 ადგილზე. ანუ, მიმდინარე სეზონში გუნდებს ადგილები აქვთ გაცვლილი.

ორი ვარიანტია – ან დღეს “ბარსელონას” ისევ ძალიან მძიმე შეხვედრა ელის, ან ეს იქნება გარდამტეხი თამაში გუნდის სწორ გზაზე დასადგომად. იმედი ვიქონიოთ, რომ მეორე ვარიანტს ვიხილავთ.

სათამაშო ფორმა

მთელი ევროპის მასშტაბით “ბარსელონაზე” უფრო არასტაბილური გუნდის მოძებნა ძნელია. რონალდ კუმანის გუნდში სტაბილური მხოლოდ თამაშის ხარისხია – კლუბისთვის აშკარად შეუსაბამო. რაც შეეხება შედეგებს – რაიმე ტენდენციის პოვნა რთულია, “ბლაუგრანა” სტაბილურად ვერც იგებს და არც აგებს. გუნდი ჩვეულად დამაჯერებლად უკვე საკუთარ კედლებშიც კი ვეღარ გამოიყურება.

თუ ვინმე ვერც იგებს და არც აგებს, უპირველესად “სოსიედადია” – სან სებასტიანელებს ბოლო 6 თამაში ფრედ აქვთ დასრულებული, აქედან 3 შეხვედრა ლა ლიგაზე მოდის.

სან სებასტიანელებმა ესპანეთის ჩემპიონატში ბოლოს სექტემბერში წააგეს, ისიც საკუთარ მოედანზე. მას შემდეგ ზედიზედ 6-ჯერ მოიგეს, შემდეგ კი 3 თამაში ფრედ დაასრულეს. ქულების ბოლო 3 მატჩში დაკარგვის მიუხედევად იმანოლ ალგუასილის გუნდი ლა ლიგაში პირველ ადგილზეა.

დანაკლისი

“ბარსელონაში” ამ მხრივ სიახლე არაფერია. კუმანი ტრავმირებულ ანსუ ფატის, სეჟი რობერტოს, ჟერარ პიკესა და უსმან დემბელეს ვერ დაიხმარს. აქედან უახლოეს მომავალში მხოლოდ დემბელეს დაბრუნებას უნდა ველოდეთ, მაგრამ მისი თავიდან დამტვრევის საშიშროება ყოველთვის არსებობს.

სტუმართა რიგებში კითხვის ნიშნებია. ასიერ ილიარამენდის მიმდინარე სეზონში ჯერ არ უთამაშია, მიკელ ოიარსაბალი კი ნოემბრის შემდეგ უთამაშებელია. დღევანდელი მატჩის განაცხადში ორივე მათგანი მოხვდა. სტუმართა მწვრთენლი ირწმუნება, რომ არცერთი არ ითამაშებს. მათი განაცხადში მოხვედრის მიზეზი ისაა, რომ გუნდი ბარსელონადან პირდაპირ ვალენსიაში მიემგზავრება, სადაც ეს მოთამაშეები საჭირონი იქნებიან. ვინ იცის, იქნებ იმანოლ ალგუასილი რონალდ კუმანს მახეს უგებს.

ბასკებს მიგელ ანხელ მოია, ხონ გურიდი და ლუკა სანგალი არ ეყოლებათ, მაგრამ მიმდინარე სეზონის გათვალისწინებით ეს დიდი დანაკლისი არაა. სამაგიეროდ დიდი დანაკლისია ძირითადი ცენტრალური მცველის, არიც ელუსტონდოს არყოფნა.

ურთიერთშეხვედრები

ურთიერთშეხვედრებში “ბარსას” დიდი უპირატესობა აქვს, რისი მიზეზიც “სოსიედადთან” “კამპ ნოუზე” შესანიშნავად თამაშია. სან სებასტიანელებს კატალონიაში ისტორიაში სულ 3 მოგება აქვთ – 1979, 1986 და 1991 წლებში. თითქმის 30 წელია “სოსიედადს” “კამპ ნოუზე” არ მოუგია, 1996 წლიდან მოყოლებული კი უკლებლივ ყველა შეხვედრას აგებს.

სულ ჩატარებული 181 თამაშიდან 105 “ბარსელონამ” მოიგო, 40 ფრედ დასრულდა, ხოლო 36-ჯერ “სოსიედადმა” იმარჯვა.  ბურთების შეფარდება – 371-183.

88 საშინაო შეხვედრიდან “ბლაუგრანამ” 75 მოიგო, 10 ფრედ დაასრულა და 3 წააგო.

არბიტრი

შეხვედრას 37 წლის ხოსე მარია სანჩეს მარტინესი განსჯის, რომლისთვისაც არც “ბარსელონაა” ახალი და არც “სოსიედადი”.

“ბარსელონას” შეხვედრაში მარტინესმა 20-ჯერ იმსაჯა. კატალონიელებმა 15-ჯერ მოიგეს (75%), 2-ჯერ ფრედ ითამაშეს (10%) და 3-ჯერ წააგეს (15%). მან “ბარსელონას” ფეხბურთელი მოედნიდან ერთხელ გააძევა (ლანგლე), მეტოქე ფეხბურთელი კი 4-ჯერ. მარტინესმა “ბლაუგრანას” სასარგებლოდ 6 თერთმეტმეტრიანი დანიშნა, ხოლო მეტოქის სასარგებლოდ 3.

“სოსიედადს” სანჩეს მარტინესის მონაწილეობით გამართულ 14 დაპირისპირებაში 5 მოგება, 3 ფრე და 6 წაგება დაუგროვდა. 37 წლის არბიტრმა სან სებასტიანელი ფეხბურთელები მოედნიდან 2-ჯერ გააძევა, მეტოქე კი არცერთხელ. მან ბასკების სასარგებლოდ 2 თერთმეტმეტრიანი დანიშნა, მათ კარში კი – 7. ამდენი პენალტი მარტინესს არცერთი სხვა გუნდის კარში არ დაუნიშნავს.

გამორჩეული ფეხბურთელი

დღევანდელი თამაში განსაკუთრებული იქნება ანტუან გრიზმანისთვის, რომელმაც ფეხი სწორედ “სოსიედადში” აიდგა. ანტუანი თავის სან სებასტიანურ კარიერაზე ცოტა ხნის წინ მიცემულ ინტერვიუში საუბრობს.

გრიზმანი “სოსიედადის” პირველ გუნდში 2009-2014 წლებში თამაშობდა, რის შემდეგაც “ატლეტიკოში” გადავიდა. ბასკურ გუნდში მან 202 თამაში ჩაატარა, 52 გოლი გაიტანა და 18 შედეგიანი გადაცემა გააკეთა.

რაც შეეხება “სოსიედადის” წინააღმდეგ სტატისტიკას – 12 თამაში, 8 მოგება, 1 ფრე, 3 მარცხი, 5 გოლი და 1 საგოლე გადაცემა. “ბარსელონას” მაისურით გრიზმანი “სოსიედადს” 2-ჯერ დაუპირიპირდა. ამ ორ მატჩში მან 1 გოლის გატანა მოახერხა.

საინტერესო ფაქტები

• “ბარსელონამ” “სოსიედადთან” “კამპ ნოუზე” გამართული ბოლო 24 თამაში მოიგო;
• “ბარსელონამ” ლა ლიგაში “კამპ ნოუზე” ჩატარებული ბოლო 37 თამაშიდან მხოლოდ 2 წააგო;
• “რეალ სოსიედადმა” ლა ლიგის ბოლო 3 თამაში ფრედ დაასრულა;
• “სოსიედადის” მიერ ლა ლიგაში ჩატარებულ ბოლო 5 თამაშში 3 გოლზე ნაკლები გადიოდა;
• “სოსიედადს” ლა ლიგის ბოლო 9 გასვლით თამაშში წაგება არ აქვს.

მწვრთნელების კომენტარები

რონალდ კუმანი

რონალდ კუმანის კომენტარი სრულად.

იმანოლ ალგუასილი

სავარაუდო შემადგენლობები

WhoScored

ბარსელონა (4-3-3): ტერ შტეგენი, დესტი, არაუხო, ლანგლე, ალბა, პედრი, ბუსკეტსი, დე იონგი, გრიზმანი, მესი, კოუტინიო.

სოსიედადი (4-3-3): რემირო, გოროსაბელი, სუბელდია, ნორმანდი, მონრეალი, სილვა, სუბიმენდი, მერინო, პორტუ, ხოსე, იანუზაი.

Sportsmole

ბარსელონა: ტერ შტეგენი, დესტი, არაუხო, ლანგლე, ალბა, ბუსკეტსი, დე იონგი, გრიზმანი, პედრი, კოუტინიო, მესი.

სოსიედადი: რემირო, გოროსაბელი, ნორმანდი, სანანი, მონრეალი, მერინო, სუბიმენდი, პორტუ, ლოპესი, იანუზაი, ხოსე.

SofaScore

ბარსელონა (4-2-3-1): ტერ შტეგენი, დესტი, არაუხო, ლანგლე, ალბა, ბუსკეტსი, დე იონგი, პედრი, მესი, კოუტინიო, გრიზმანი.

სოსიედადი (4-2-3-1): რემირო, გოროსაბელი, ნორმანდი, სუბელდია, მონრეალი, მერინო, გევარა, იანუზაი, სილვა, ბარენეჩეა, ხოსე.

პროგნოზი

• WhoScored: 2-2
• Sportsmole: 1-1

ტრანსლაცია

თამაში 00:00 საათზე დაიწყება, მის ტრანსლაციას სილქ უნივერსალი და Silksport.ge გთავაზობთ.

კომენტარებში დაწერეთ, რა კომპონენტის დამატებას ისურვებდით მატჩისწინა მიმოხილვებში და დავამატებთ.