“ბარსელონამ” სეზონში პირველი ქულები დაკარგა

ლა ლიგის მე-5 ტურში, “ბარსელონამ” “კამპ ნოუზე” “სევილიას” უმასპინძლა და სეზონში პირველი ქულები დაკარგა. 

შეხვედრა ფრედ, 1-1 დასრულდა. მატჩის მე-8 წუთზე ანგარიში სტუმართა მხრიდან ლუკ დე იონგმა გახსნა, რასაც რამდენიმე წამში გოლით ფილიპე კოუტინიომ უპასუხა. თამაშის განმავლობაში, “ბარსამ” ბევრი რეალური მომენტი ვერ შექმნა და მნიშვნელოვანი უპირატესობის მოპოვება მხოლოდ ბოლო წუთებზე მოახერხა, რაც საკმარისი არ აღმოჩნდა. 

ასე რომ, რონალდ კუმანის გუნდს, ისევე როგორც მის დღევანდელ მეტოქეს, 3 თამაშში 7 ქულა აქვს. ამ მომენტისთვის ცხრილის სათავეში მადრიდის “რეალია”, თუმცა მადრიდელებს კატალონიელებზე ერთით მეტი შეხვედრა აქვთ ჩატარებული. 

მატჩის ერთ-ერთი ყველაზე მნიშვნელოვანი მოვლენა სერჟინიო დესტის დებიუტი იყო. ამერიკელი მცველი მოედანზე 79-ე წუთზე, ჟორდი ალბას ნაცვლად გამოვიდა. 

ხვალიდან, “ბარსელონას” ფეხბურთელები თავიანთ ეროვნულ გუნდებს შეუერთდებიან. სანაკრებო პაუზა 2 კვირა გაგრძელდება. “ბარსა” ესპანეთის ჩემპიონატში თამაშს 18 ოქტომბერს განაახლებს – ლურჯ-ბროწეულისფერები სტუმრად “ხეტაფეს” დაუპირისპირდებიან.