7 მიზეზი, თუ რატომ უნდა გვჯეროდეს, რომ “ბარსელონა” ჩემპიონთა ლიგას მოიგებს

2018/19 წლების სეზონი “ბარსელონასთვის” ბოლომდე წარმატებულად მხოლოდ იმ შემთხვევაში ჩაითვლება, თუ გუნდი ყველა ტურნირს მოიგებს, რომელშიც ასპარეზობს. ტრიპლეტის მოგების სურვილი “ბარსას” მწვრთნელმა და ფეხბურთელებმა უკვე არაერთხელ გამოთქვეს. 

ლა ლიგასა და კოპა დელ რეიზე გამარჯვებასთან კატალონიელები საკმაოდ ახლოს არიან, წარმატების მიღწევა კი ყველაზე რთული ჩემპიონთა ლიგაზე იქნება. რამდენად რეალურია ის, რომ “ბარსელონა” საუკეთესოობას ევროპულ არენაზეც იზეიმებს?

მესის ფაქტორი

საფეხბურთო თვალსაზრისით კარგ ხასიათზე მყოფი ლიონელ მესი მისი გუნდის კარგ შედეგთან ასოცირდება, ჩემპიონთა ლიგაზე ბოლოდროინდელი წარუმატებლობა კი მისთვის დამატებითი მოტივატორის როლს უნდა ასრულებდეს. 

1/4 ფინალის წინ, არგენტინელი ტურნირის ორ საუკეთესო ბომბარდირს შორისაა. ბოლო შეხვედრაში, “ლიონთან”, მან დუბლი შეასრულა, ორი საგოლე პასი გააკეთა და როცა საჭირო იყო, შავი სამუშაოს შესრულებაც საკუთარ თავზე აიღო. 

თუ მესი ფორმაში იქნება, “ბარსელონას” შანსები ძალიან გაიზრდება. 

აუღებელი “კამპ ნოუ”

“ლიონთან” გამარჯვებით, “ბარსელონამ” კიდევ ერთი რეკორდი დაამყარა: 30 საშინაო მატჩი წაგების გარეშე. ჩემპიონთა ლიგაზე საუკეთესო შედეგი აქამდე მიუნხენის “ბაიერნს” ეკუთვნოდა, რომელიც “ალიანც არენაზე” დაუმარცხებელი 29 შეხვედრის განმავლობაში იყო. 

“კამპ ნოუს” ფაქტორი “ბარსელონას” ნებისმიერი მეტოქის წინააღმდეგ უპირატესობას აძლევს. 

ჩემპიონთა ლიგის საუკეთესო მეკარე

“ლივერპულის” წინააღმდეგ მანუელ ნოიერის საკმაოდ უსახური თამაშის და იან ობლაკის მიერ “იუვენტუსთან” 3 გოლის გაშვების შემდეგ, ჩემპიონთა ლიგაზე შემორჩენილ მეკარეებს შორის მარკ-ანდრე ტერ შტეგენი, ობიექტურად თუ არა, გულშემატკივრების დიდი ნაწილის სუბიექტური აზრის მიხედვით მაინც საუკეთესოა. 

გერმანელ ფეხბურთელისთვის ბოლო ორი სეზონი კარიერაში საუკეთესოა და ის ახლაც ფორმაშია, მეკარის სტაბილურობა კი ტურნირზე, სადაც გამარჯვებულის ვინაობას რამდენიმე მომენტი წყვეტს და თითოეული შეცდომა ქვეყნის ჩემპიონატში დაშვებულზე ძვირად ფასობს, შესაძლოა, გადამწყვეტი აღმოჩნდეს. 

შემადგენლობა

ტრავმირებული ფეხბურთელების რაოდენობა ბოლო პერიოდში შემცირდა და ერნესტო ვალვერდეს ძირითადი შემადგენლობების დაკომპლექტება უფრო ადვილად შეეძლება. 

ხანგრძლივი პაუზის შემდეგ, სამუელ უმტიტი გუნდს დაუბრუნდა, ისევე, როგორც ფილიპე კოუტინიო პაუზის გარეშე. ბრაზილიელმა “ლიონის” წინააღმდეგ გაუმჯობესების ნიშნები აჩვენა. 

სეზონის პირველ ნახევართან შედარებით, უკეთეს შთაბეჭდილებას ტოვებენ ლუის სუარესი და ნელსონ სემედუც. საერთო ჯამში, “ბარსელონაში” ძირითადი შემადგენლობის 15-მდე მოთამაშეა და შესაბამისად, სათადარიგოთა სკამი ყოველთვის ძლიერი იქნება. 

პიკე საუკეთესო ფორმაში

სეზონის სტარტზე, “ბარსელონას” მიერ ქულების ხშირ დაკარგვაში ყველაზე დიდი დამსახურება ჟერარ პიკეს ჰქონდა. თუმცა, კატალონიელმა მცველმა და შეთავსებით თავდამსხმელმა თამაში აშკარად გამოასწორა. ის ძალიან კარგ ფორმაშია, დაცვას ლიდერობს და გუნდს შეტევაშიც ეხმარება. 

მიმდინარე სეზონში პიკეს ანგარიშზე 7 გოლია, რაც მისი პოზიციის ფეხბურთელისთვის შესანიშნავი მაჩვენებელია. 

ჩავის შემცვლელი

იმ ფეხბურთელებს შორის, რომლითაც “ბარსელონამ” ჩავი ერნანდესის ჩანაცვლება სცადა, არტური აშკარად საუკეთესოა. ლეგენდარული ესპანელის დონემდე მას, რა თქმა უნდა, კიდევ ბევრი უკლია, თუმცა, თუ ასე გააგრძელებს, 22 წლის ბრაზილიელი მსოფლიოში ერთ-ერთი საუკეთესო ნახევარმცველი მალე გახდება. 

“ლიონთან”, არტურმა პასების 98.6% ზუსტად შეასრულა და გოლების შექმნაშიც მიიღო მონაწილეობა. 

უნიკალური შანსი

“ბარსელონასთან” ერთად ჩემპიონთა ლიგას 7 ძალიან ძლიერი გუნდი შემორჩა, თუმცა მათ შორის არ არის ორი ესპანური გუნდი, რაც ერნესტო ვალვერდეს გუნდისთვის ნამდვილად უკეთესია. 

მადრიდის “რეალი” ტურნირის ზედიზედ სამგზის გამარჯვებულია, “ატლეტიკომ” კი “ბარსა” ლიგიდან ბოლო რამდენიმე წლის განმავლობაში ორჯერ გამოაგდო. 

ასე რომ, “ბარსელონას” გამარჯვების უნიკალური შანსი აქვს, კატალონიაში კი ეს კარგად იციან.