ვალვერდეს ორმაგი დილემა

ნახევარფინალის წილისყრამ სამეფო თასის მიმართ “ბარსელონას” დამოკიდებულება კარდინალურად შეცვალა. ფინალის საგზურისთვის კატალონიური გრანდი მადრიდის “რეალს” დაუპირისპირდება. ერნესტო ვალვერდე ორი პრობლემის წინაშე დგას, რაც უსმან დემბელესა და ლიონელ მესის დაზიანებებში მდგომარეობს.

6 თებერვალს, “კამპ ნოუს” ფორმაში ჩამდგარი “სამეფო კლუბი” ეწვევა. ესპანეთის მოქმედ ჩემპიონთა არგენტინელმა ლიდერმა “ვალენსიასთან” მატჩის მეორე ნახევარში ბარძაყის დაზიანება მიიღო. ვალვერდეს კომენტარსა და მედიის წინასწარ ინფორმაციაზე დაყრდნობით შეგვიძლია ვივარაუდოთ, რომ საქმე მიკრო ტრავმასთან გვაქვს. თუმცა, არავინ იცის იქნება თუ არა “ბლაუგრანას” ათიანი “კლასიკოსთვის” 100 პროცენტით მზად.

რაც შეეხება დემბელეს – უსმანს მყესის დაზიანების გამო 15 დღის გაცდენა მოუწია. “ბარსას” ამომავალი ვარსკვლავი სრულ მზადყოფნაში არაა. სამწუხაროდ, გარემარბის ტრავმას ავადმყოფობაც დაემატა. სხეულის გადაჭარბებული ტემპერატურის გამო ექიმებმა ფრანგ შემტევს ვარჯიშის უფლება არ დართეს.

თავდასხმის პრობლემა აშკარად გამოიკვეთა. ერნესტო ვალვერდეს 6 თებერვლამდე ბევრი სამუშაო ექნება.