“რეალ მადრიდის” ყოფილმა ნახევარმცველმა ტონი კროოსმა “ატლეტიკოსთან” “ბარსელონას” გამარჯვება (2-1) შეაფასა. გერმანელმა ლამინ იამალის ინდივიდუალური ოსტატობა და პაუ კუბარსის დაცვითი შესაძლებლობები გამოარჩია, თუმცა ჰანსი ფლიკის ტაქტიკის მიმართ კრიტიკული მოსაზრებებიც გამოთქვა.
კროოსი განსაკუთრებით მოიხიბლა ლამინ იამალის თამაშით, რომელმაც “მეტროპოლიტანოზე” მატჩის საწყის მონაკვეთში მეტოქის დაცვას არაერთი პრობლემა შეუქმნა.
“ლამინ იამალის პირველი 25 წუთი “მეტროპოლიტანოზე” აბსოლუტურად გამორჩეული იყო.”
გერმანელის შეფასებით, იამალი მხოლოდ ხელსაყრელ პოზიციებში ბურთის მიღებით არ გამოირჩეოდა. ის საკუთარი ინდივიდუალური ოსტატობით ქმნიდა რიცხობრივ უპირატესობას, ამწვავებდა შეტევებს და თანაგუნდელებს საგოლე მომენტებს უქმნიდა.
კროოსის თქმით, თამაშის გარკვეულ მონაკვეთში ისეთი შთაბეჭდილება რჩებოდა, თითქოს იამალი თანაგუნდელებს ბურთის გადაცემას სთხოვდა, რადგან მატჩის ბედის შეცვლა თავად შეეძლო.
კროოსი: კუბარსი ბარსელონას საუკეთესო მცველია
გერმანელმა განსაკუთრებული ყურადღება “ბარსელონას” დაცვის ხაზსაც დაუთმო. მისი აზრით, ფლიკის გუნდის მთავარი პრობლემა ისაა, რომ მეტოქის მიერ პრესინგის დაძლევის შემთხვევაში მცველებს უკან უზარმაზარი თავისუფალი სივრცე რჩებათ.
კროოსმა მაგალითად “ბაიერნის” მცველი დაიო უპამეკანო მოიყვანა, რომელსაც შეუძლია მეტოქესთან ერთი ერთზე თამაში მაშინაც კი, როდესაც მის უკან 30 მეტრი თავისუფალი სივრცეა.
მისი შეფასებით, “ბარსელონას” შემადგენლობაში ამგვარ სიტუაციებთან გამკლავება ყველაზე უკეთ პაუ კუბარსის შეუძლია. გერმანელმა ახალგაზრდა ესპანელის სისწრაფე და ორთაბრძოლებში საიმედოობა გამოარჩია.
თუმცა კროოსი მიიჩნევს, რომ დაცვის დანარჩენ წევრებს მსგავსი შესაძლებლობები არ აქვთ. მისი თქმით, განსაკუთრებით რთულია დიდი სივრცეების კონტროლი მაშინ, როდესაც დაცვის ხაზში ჟოაუ კანსელუ და ჟერარ მარტინი თამაშობენ.
გერმანელმა ალფონსო დევისიც ახსენა და აღნიშნა, რომ ასეთი სისწრაფის მცველების შემთხვევაში მაღალი დაცვის ხაზით თამაში გაცილებით ნაკლებად სარისკო იქნებოდა.
რატომ გაუჭირდება ბარსელონას ჩემპიონთა ლიგის მოგება?
კროოსის აზრით, სწორედ დაცვაში არსებული სისუსტეები შეიძლება გახდეს “ბარსელონასთვის” გადაულახავი დაბრკოლება ჩემპიონთა ლიგაზე.
გერმანელმა განმარტა, რომ ფლიკის გუნდი მეტოქეზე მეტი საგოლე მომენტის შექმნასა და შეტევაში უპირატესობის მოპოვებაზეა ორიენტირებული, თუმცა ევროპის საუკეთესო კლუბების წინააღმდეგ ეს მიდგომა ყოველთვის ვერ გაამართლებს.
ჩემპიონთა ლიგაზე “ბარსელონას” ისეთ მეტოქეებთან უწევს დაპირისპირება, რომლებსაც ერთ მატჩში რამდენიმე გოლის გატანა შეუძლიათ. ამასთან, არსებობენ გუნდები, რომლებიც იმდენად კარგად იცავენ თავს, რომ კატალონიელებს ჩვეული შემტევი ფეხბურთის თამაშის საშუალებას არ აძლევენ.
კროოსი მიიჩნევს, რომ სახიფათოა მიდგომა, რომლის დროსაც გამარჯვებისთვის გუნდს თითქმის ყოველთვის ორი ან სამი გოლის გატანა სჭირდება.
მიუხედავად კრიტიკისა, გერმანელმა ხაზგასმით აღნიშნა, რომ “ბარსელონას” დღევანდელი ფეხბურთი ძალიან მოსწონს.
“პირადად მე ძალიან მომწონს “ბარსელონას” დღევანდელი სტილი. ვფიქრობ, ის ბრწყინვალე და წარმოუდგენლად სანახაობრივია.”
თუმცა კროოსის საბოლოო შეფასებით, კატალონიურ გუნდს ამგვარი ფეხბურთის უპრობლემოდ სათამაშოდ აუცილებელი გამორჩეული დაცვითი შესაძლებლობები არ გააჩნია.
forum კომენტარები (0)