“ბარსელონას” ცენტრალურმა მცველმა პაუ კუბარსიმ 2026 წლის Golden Boy-ის ჯილდოს მოპოვების შემდეგ პირველი კომენტარი გააკეთა. 19 წლის ფეხბურთელმა, რომელიც ევროპის 21 წლამდე საუკეთესო მოთამაშედ აღიარეს, მიღწეული წარმატებით კმაყოფილება გამოთქვა.
იტალიური გამოცემა Tuttosport-ის მიერ ორგანიზებული ჯილდოს გამარჯვებული 9 ნოემბერს გამოვლინდა. კუბარსიმ აღიარება 2026 წელს ნაჩვენები შესანიშნავი თამაშით დაიმსახურა. მან “ბარსელონასთან” ერთად ესპანეთის ჩემპიონატი და სუპერ თასი მოიგო, ესპანეთის ნაკრებთან ერთად კი მსოფლიო ჩემპიონი გახდა.
კუბარსიმ ორგანიზატორებისთვის ჩაწერილ ვიდეომიმართვაში განაცხადა:
“ძალიან მიხარია, რომ ეს ჯილდო მოვიგე. ნამდვილად ვამაყობ. შესანიშნავი წელი იყო. დიდი მადლობა ყველას, ახლა კი უფრო მეტისთვის ვიბრძოლებთ.”
ახალგაზრდა მცველმა განსაკუთრებული მადლობა გადაუხადა Tuttosport-სა და ჟურნალისტებს, რომლებმაც მას ხმა მისცეს. კუბარსიმ ასევე აღნიშნა ოჯახის, მეგობრების, “ბარსელონასა” და ესპანეთის ნაკრების ფეხბურთელებისა და სამწვრთნელო შტაბების მხარდაჭერა, რის გარეშეც, მისი თქმით, ამ წარმატებას ვერ მიაღწევდა.
2026 წელი კუბარსისთვის განსაკუთრებით წარმატებული გამოდგა. ესპანეთის ნაკრების შემადგენლობაში მსოფლიო ჩემპიონატის მოგებასთან ერთად, ის ტურნირის საუკეთესო ახალგაზრდა ფეხბურთელადაც დასახელდა.
აღსანიშნავია, რომ “ოქროს ბურთის” ბოლო დაჯილდოებაზე ლამინ იამალმა, რომელმაც კოპას ჯილდო ზედიზედ მესამედ მოიპოვა, განაცხადა, რომ ამ აღიარებისთვის პაუ კუბარსი უფრო შესაფერის კანდიდატად მიაჩნდა.
Golden Boy-ის გამარჯვებით კუბარსი “ბარსელონას” იმ ფეხბურთელებს შეუერთდა, რომლებსაც ეს პრესტიჟული ჯილდო უკვე მოგებული აქვთ. მათ შორის არიან ლიონელ მესი (2005), პედრი (2021), გავი (2022) და ლამინ იამალი (2024).
კუბარსი Golden Boy-ის ისტორიაში მხოლოდ მეორე მცველია, რომელმაც გამარჯვება მოახერხა. პირველი მატეის დე ლიხტი იყო, რომელმაც ჯილდო 2018 წელს მოიგო.
პაუ კუბარსის Golden Boy 2026-ის ჯილდოს ოფიციალურად 14 დეკემბერს, იტალიის ქალაქ ტურინში გამართულ საზეიმო ცერემონიაზე გადასცემენ.
forum კომენტარები (0)