“ბარსელონა” კიდევ ერთხელ ამტკიცებს, რომ ანგარიშში ჩამორჩენა მისთვის დამარცხებას არ ნიშნავს. 8 ნოემბერს, “ატლეტიკოსთან” სტუმრად მოპოვებული გამარჯვება (2-1) კატალონიელებისთვის 2026/27 წლების სეზონში უკვე მეოთხე წარმატებული ქამბექი აღმოჩნდა.
მადრიდში მოპოვებული სამი ქულით ჰანსი ფლიკის გუნდმა ლა ლიგაში ლიდერობა შეინარჩუნა და უახლოეს მდევარ “რეალ მადრიდთან” სამქულიანი უპირატესობა დაიტოვა.
აღსანიშნავია, რომ ეს ჰანსი ფლიკისთვის “ბარსელონას” მთავარი მწვრთნელის პოსტზე უკვე 23-ე გამარჯვებაა ისეთ მატჩში, რომელშიც მისი გუნდი თავდაპირველად მარცხდებოდა.
ზედიზედ სამი ქამბექი მეტროპოლიტანოზე
განსაკუთრებით შთამბეჭდავია “ბარსელონას” შედეგები “ატლეტიკოს” საშინაო სტადიონზე. კატალონიელებმა “მეტროპოლიტანოზე” ლა ლიგის ზედიზედ სამ შეხვედრაში შეძლეს ანგარიშის შემოტრიალება.
2024/25 წლების სეზონში “ბარსელონა” მადრიდში მატჩის დასრულებამდე 20 წუთით ადრე 0-2 მარცხდებოდა, თუმცა დარჩენილ დროში ოთხი გოლი გაიტანა და 4-2 გაიმარჯვა. ეს წარმატება მნიშვნელოვანი აღმოჩნდა იმ სეზონში, რომელიც კატალონიელებმა ესპანეთის ჩემპიონობით დაასრულეს.
2025/26 წლების სეზონში “ატლეტიკო” ჯულიანო სიმეონეს გოლით დაწინაურდა, თუმცა მარკუს რაშფორდმა და რობერტ ლევანდოვსკიმ “ბარსელონას” გამარჯვება მოუტანეს – 2-1.
მსგავსი სცენარით განვითარდა წლევანდელი დაპირისპირებაც. 8 ნოემბერს ანგარიში კვლავ ჯულიანო სიმეონემ გახსნა, მაგრამ ამჯერად გადამწყვეტი როლი ფერმინ ლოპესმა შეასრულა. ახალგაზრდა ნახევარმცველმა დუბლი გაიფორმა და “ბარსელონას” სამი ქულა მოუტანა.
ბარსელონა ევროპის საუკეთესო გუნდებს შორის
მიმდინარე სეზონში “ბარსელონამ” ჩამორჩენის შემდეგ ოთხი მატჩი მოიგო, მათგან სამი – ესპანეთის ჩემპიონატში.
ევროპის ხუთი წამყვანი ჩემპიონატის მასშტაბით, ლიგის მატჩებში შესრულებული ქამბექების რაოდენობით კატალონიელებს მხოლოდ მილანის “ინტერი” უსწრებს, რომელმაც ოთხჯერ მოახერხა ანგარიშის შემოტრიალება და გამარჯვება.
სამი ქამბექით “ბარსელონა” მეორე ადგილს სანტანდერის “რასინგთან” ერთად იყოფს.
ეს სტატისტიკა კიდევ ერთხელ უსვამს ხაზს ფლიკის გუნდის ბრძოლისუნარიანობას. “ატლეტიკოსთან” მოპოვებული გამარჯვება კი იმის მორიგი მაგალითია, რომ “ბარსელონას” წინააღმდეგ დაწინაურება წარმატების გარანტიას არ იძლევა.
forum კომენტარები (0)