ბარსელონას რთული გამოცდა: ატლეტიკომ პირველ ტაიმებში მხოლოდ ერთი გოლი გაუშვა

“ბარსელონა” 8 ნოემბერს ლა ლიგის ერთ-ერთ უმნიშვნელოვანეს მატჩში “ატლეტიკოს” დაუპირისპირდება. შეხვედრამდე ყურადღებას იქცევს მადრიდელთა შთამბეჭდავი დაცვითი სტატისტიკა, რომელიც ჰანსი ფლიკის გუნდისთვის სერიოზულ გამოწვევას წარმოადგენს.

“ბარსელონა” ესპანეთის ჩემპიონატის ყველაზე შედეგიანი გუნდია 46 გატანილი გოლით. ეს მაჩვენებელი ორჯერ აღემატება “ატლეტიკოს” შედეგს (22 გოლი). მიუხედავად ამისა, გუნდებს შორის სატურნირო ცხრილში მხოლოდ ორი ქულაა: კატალონიელები 30 ქულით ლიდერობენ, ხოლო დიეგო სიმეონეს გუნდი 28 ქულით მეორე ადგილზეა.

“ატლეტიკოს” მიმდინარე სეზონში მხოლოდ 8 გოლი აქვს გაშვებული, რომელთაგან პირველ ტაიმზე მხოლოდ ერთი მოდის. ისიც მსაჯის მიერ დამატებულ დროში, 45+6-ე წუთზე გავიდა, როდესაც “ალავესის” თავდამსხმელმა ლუკას ბოიემ პენალტი გამოიყენა. მადრიდელებმა ის შეხვედრა საბოლოოდ 2-1 მოიგეს.

საინტერესოა გუნდების შედეგიანობის განაწილებაც. “ბარსელონას” პირველ ტაიმებში 22 გოლი აქვს გატანილი, ხოლო მეორეში – 24. “ატლეტიკოს” შემთხვევაში განსხვავება გაცილებით დიდია: პირველ ტაიმებში მხოლოდ 6 გოლი, მეორეში კი 16.

ეს თავისებურება სატურნირო მდგომარეობაზეც აისახება. მატჩები პირველი ტაიმების შედეგებით რომ სრულდებოდეს, “ატლეტიკო” 17 ქულით მეექვსე ადგილზე იქნებოდა, ხოლო “ბარსელონა” 28 ქულით ლიდერი. თუმცა მეორე ტაიმებში მადრიდელებმა დამატებით 11 ქულის მოპოვება შეძლეს და რეალურ ცხრილში 28 ქულით მეორე პოზიციაზე იმყოფებიან.

თავის მხრივ, “ბარსელონა” მატჩების საწყის წუთებში განსაკუთრებით სახიფათოა. მიმდინარე სეზონში, ლა ლიგისა და ჩემპიონთა ლიგის 15 შეხვედრიდან 9-ში კატალონიელებმა პირველი 15 წუთის განმავლობაში გაიტანეს და ცხრავე მატჩი მოიგეს.

ამრიგად, “მეტროპოლიტანოზე” ორი განსხვავებული სათამაშო სტილი დაუპირისპირდება ერთმანეთს. ერთ მხარეს იქნება “ბარსელონას” შედეგიანი შეტევა, მეორე მხარეს კი “ატლეტიკოს” საიმედო დაცვა და მეორე ტაიმებში თამაშის შემოტრიალების უნარი.

აღსანიშნავია ისიც, რომ ჰანსი ფლიკის “ბარსელონაში” მუშაობის დაწყების შემდეგ “ატლეტიკო” ერთადერთი გუნდია, რომელმაც კატალონიელთა დამარცხება სამჯერ შეძლო.