კლოპის გადაწყვეტილებამ გერმანიაში გაკვირვება გამოიწვია – ადეიემი ნაკრებს მიღმა დარჩა

გერმანიის ნაკრების მთავარმა მწვრთნელმა იურგენ კლოპმა “ბარსელონას” შემტევი კარიმ ადეიემი ნოემბრის სანაკრებო მატჩებისთვის არ გამოიძახა. გადაწყვეტილებამ გერმანულ მედიასა და ყოფილ ფეხბურთელებს შორის განხილვა გამოიწვია.

ადეიემი კლოპის პირველ, 44-კაციან განაცხადში მოხვდა, თუმცა ამჯერად 24 ფეხბურთელს შორის მისი ადგილი აღარ აღმოჩნდა. გერმანია ერთა ლიგაზე 13 ნოემბერს სერბეთს, ხოლო 16 ნოემბერს ნიდერლანდებს დაუპირისპირდება.

როგორც Mundo Deportivo წერს, გერმანულმა გამოცემა Bild-მა ადეიემის არგამოძახება დიდ სიურპრიზად შეაფასა. 24 წლის ფეხბურთელმა მიმდინარე სეზონში “ბარსელონას” მაისურით 14 მატჩში მიიღო მონაწილეობა და მოედანზე გატარებულ 542 წუთში 4 გოლი და 3 საგოლე გადაცემა მიითვალა.

გასულ ზაფხულს დორტმუნდის “ბორუსიადან” გადმოსული ფეხბურთელი ჰანსი ფლიკის გუნდში ჯერჯერობით რეგულარულად არ თამაშობს ძირითად შემადგენლობაში. სასტარტო თერთმეტეულში ადგილისთვის მისი მთავარი კონკურენტი ენტონი გორდონია, რომელიც კატალონიურ კლუბს “ნიუკასლიდან” შეუერთდა.

გერმანიის ნაკრების ყოფილმა ნახევარმცველმა დიტმარ ჰამანმა კლოპის გადაწყვეტილება გააკრიტიკა.

“ადეიემის არგამოძახება ძალიან გამიკვირდა. მე მას ნაკრებში წავიყვანდი. ასეთი სისწრაფის მქონე ფეხბურთელი ბევრი არ არის.”

ჰამანმა “ბარსელონაში” ადეიემის თამაშიც დადებითად შეაფასა და აღნიშნა, რომ ფეხბურთელმა ფლიკის ნდობა გაამართლა.

“ამ დრომდე შესანიშნავად თამაშობს. მნიშვნელოვანი და ლამაზი გოლებიც გაიტანა და გუნდსაც ეხმარება.”

განსხვავებული მოსაზრება აქვს გერმანიის ნაკრების ყოფილ მეკარეს, 2014 წლის მსოფლიო ჩემპიონ რომან ვაიდენფელერს, რომელიც კლოპთან ერთად დორტმუნდის “ბორუსიაში” მუშაობდა.

Sky-ის გადაცემაში Triple – Der Hagedorn-Fußballtalk ვაიდენფელერმა გაიხსენა, რომ ნიდერლანდებთან შეხვედრაში ადეიემიმ კარგი დასაწყისის მიუხედავად შესანიშნავი საგოლე შესაძლებლობა ვერ გამოიყენა. თუმცა, მისი აზრით, კლოპისთვის უფრო მნიშვნელოვანი ფეხბურთელის დაცვითი მოქმედებები შეიძლება ყოფილიყო.

“კარიმმა დაცვაში დაბრუნებაზე ძალიან გვიან რეაგირება მოახდინა, კლოპს კი ეს საერთოდ არ მოსწონს.”

ვაიდენფელერის განმარტებით, კლოპი შემტევებს შეტევაში თავისუფლებას აძლევს, თუმცა მათგან დაცვითი მოვალეობების შესრულებასაც მოითხოვს.

“ვფიქრობ, სწორედ ასეთი წვრილმანები აღიზიანებს იურგენს. შესაძლოა, ადეიემის არგამოძახება ერთგვარი გაფრთხილებაც იყოს.”

აღსანიშნავია, რომ ადეიემი გერმანიის ნაკრების შემადგენლობაში წინა მსოფლიო ჩემპიონატზეც ვერ მოხვდა, როდესაც გუნდს იულიან ნაგელსმანი ხელმძღვანელობდა. ამჯერად კი ფეხბურთელს სანაკრებო პაუზის განმავლობაში “ბარსელონაში” დარჩენა მოუწევს.