უნიკალური შრიფტი თითოეული ფორმისთვის: ბარსელონას მორიგი ინოვაციური ნაბიჯი

“ბარსელონა” მსოფლიო ფეხბურთში ყოველთვის ეტალონია თავისი გამორჩეული სათამაშო სტილის წყალობით, თუმცა კლუბი მოედნის მიღმაც ყოველთვის განსაკუთრებულ სტანდარტებს ამკვიდრებს, განსაკუთრებით მაშინ, როდესაც საქმე სათამაშო მაისურებს ეხება.

მიმდინარე სეზონში “ბარსამ” ფეხბურთის ისტორიაში პიონერული სტრატეგია წარადგინა: Nike-ის სამივე სათამაშო ფორმისთვის სახელებისა და ნომრების უნიკალური შრიფტი შეიქმნა. ეს მიდგომა მაისურების საერთო დიზაინს კიდევ უფრო ამდიდრებს და კლუბს მოედნის მიღმაც ინოვატორის სტატუსს უმყარებს.

მოდერნისტული შრიფტი საშინაო ფორმისთვის

კატალონიური მოდერნიზმით შთაგონებული საშინაო ბლაუგრანა ფორმა 2026/27 წლების სეზონში სახელებისა და ნომრების ახალ ოფიციალურ ტიპოგრაფიას წარმოადგენს. ეს ექსკლუზიური შემოქმედება სპეციალურად კლუბისთვის შეიქმნა, რათა გაეძლიერებინა ვიზუალური კავშირი “ბარსას” იდენტობას, ქალაქ ბარსელონასა და კატალონიის კულტურულ მემკვიდრეობას შორის.

ფორმატის თვალსაზრისით, ახალი შრიფტი კატალონიური მოდერნიზმის ყველაზე გამორჩეულ ვიზუალურ ელემენტებს აერთიანებს. სტილიზებული ფორმები, ვერტიკალური პროპორციები და ორგანული დაბოლოებები იმ გრაფიკულ ენას აცოცხლებს, რომელმაც კატალონიის ისტორიაში ერთ-ერთი ყველაზე გავლენიანი შემოქმედებითი ეპოქა განსაზღვრა. ნომრებში გამოყენებულია რთული შიდა ხაზები, რაც სიღრმეს, ტექსტურასა და დინამიზმს სძენს მას და თანამედროვე ჭრილში გადააქვს მოდერნისტული მოძრაობის ხელნაკეთი სული.

მამაკაცთა პირველი გუნდი ამ ორიგინალურ შრიფტს უეფას ჩემპიონთა ლიგაზე, კოპა დელ რეისა და ესპანეთის სუპერ თასზე გამოიყენებს, ხოლო ლა ლიგაში ორგანიზატორების მიერ დადგენილი ოფიციალური შრიფტით გააგრძელებს ასპარეზობას. ახალი ტიპოგრაფია ასევე დაინერგება კლუბის სხვა პროფესიულ, აკადემიისა და სპორტულ სექციებშიც.

კობი ბრაიანტის ესთეტიკა მეორე ფორმაზე

2026/27 წლების სეზონის საგარეო ფორმისთვის შექმნილი შრიფტი კალათბურთის გრაფიკული სამყაროთი და ლეგენდარულ კობი ბრაიანტთან ასოცირებული ესთეტიკითაა შთაგონებული. ის ორიენტირად ცნობილ “Mamba Mentality”-ს (მამბას მენტალიტეტს) იღებს და მას დახვეწილ, თანამედროვე პრიზმაში წარმოაჩენს.

დიზაინში გამოყენებულია მაღალი კონტრასტის სერიფული (Serif) შრიფტი მოგრძო, ელეგანტური და ქანდაკებისებური ფორმებით. ნომრების ვერტიკალური პროპორციები სისწრაფის, სიმაღლისა და სიძლიერის შეგრძნებას გადმოსცემს და ამავდროულად საკალათბურთო მაისურების კლასიკურ ესთეტიკას უკავშირდება. ოქროსფერი ელფერი ხაზს უსვამს პრემიალურ ხარისხს და პირდაპირ ებმის მეორე ფორმის ვიზუალს, მუქ ფონთან კონტრასტი კი მაღალი კლასის სპორტულ ელეგანტურობას ქმნის.

წარსულის ექო მესამე ფორმაში

მესამე კომპლექტისთვის შექმნილი ტიპოგრაფია Nike-ის 1990-იანი წლების კლასიკური ნომრების არსს უბრუნდება – ეპოქას, რომელიც როგორც მსოფლიო ფეხბურთის, ისე “ბარსელონას” უახლეს ისტორიაში განსაკუთრებულად საკულტო იყო. დიზაინი იმ პერიოდისთვის დამახასიათებელ თამამ, კომპაქტურ და გეომეტრიულ ფორმებს ეფუძნება. პროპორციები, მრუდები და დამუშავება იმ დროის გრაფიკულ ენას თანამედროვე ინტერპრეტაციით აცოცხლებს.

ტექნოლოგიური ინოვაცია და პრემიუმ პარტნიორი

ინოვაცია უშუალოდ ნომრებისა და გვარების ბეჭდვის ტექნოლოგიასაც შეეხო. ზურგზე არსებულ ნომრებს მიკროპერფორაცია აქვს, რაც ჰაერგამტარობას საგრძნობლად აუმჯობესებს. ასოები და ციფრები პლასტმასის ნაცვლად წყლის ბაზაზე დამზადებული მასალით იბეჭდება, რაც მათ წონას ამცირებს, შეხებისას გაცილებით რბილია და გაცილებით თხელ, სუნთქვად ფენას ქმნის.

კლუბის პარტნიორი ამ მიმართულებით კომპანია Stahls გახლავთ – თერმობეჭდვის ტექნოლოგიების გლობალური ლიდერი, რომელიც 1932 წლიდან დღემდე სპორტულ ინდუსტრიაში მოწინავე საწარმოო გადაწყვეტილებებს ნერგავს.