რატომ უკეთიათ “ბარსელონას” ფეხბურთელებს სახვევები ხელებზე? შეთქმულების თეორიები და რეალობა

ეს ერთი შეხედვით უჩვეულო, თუმცა მეტად აქტუალური თემაა, რომელიც პერიოდულად კვლავ აქტიურდება: რატომ ატარებს “ბარსელონას” ზოგიერთი ფეხბურთელი სახვევებს მტევნებზე, თითებსა თუ მაჯებზე?

სცენარი ყოველთვის იდენტურია: როგორც კი “ბარსა” ფანტასტიკურ ფორმას აკრეფს, მეტოქეებს ზედიზედ ანადგურებს და შემტევ ფეხბურთს აჩვენებს (ზუსტად ისე, როგორც ახლა – ლა ლიგაში 7-დან 7 მოგებითა და 31 გატანილი გოლი), სოციალურ ქსელებში მყისვე ჩნდება შეთქმულების თეორიები.

პირველად ეს თემა 2025 წელს, ჰანსი ფლიკის სადებიუტო სეზონის მიწურულს გააქტიურდა, როდესაც “ბარსელონა” შიდა ტრებლისკენ (ლა ლიგა, კოპა დელ რეი და ესპანეთის სუპერ თასი) მიიწევდა. X-სა (ყოფილი Twitter) და სხვა პლატფორმებზე აბსურდული ვერსიები გავრცელდა: თითქოს კატალონიელები სახვევებს ნემსის კვალის დასამალად იყენებდნენ, რითაც ვითომდა ფიზიკური კონდიციების უკანონო გაუმჯობესებას ნიღბავდნენ.

რეალ მადრიდის ყოფილი ექიმის განცხადება და რაფინიას პასუხი

2025 წლის მაისში “ბარსელონამ” “რეალ მადრიდს” დრამატულ ბრძოლაში 4-3 მოუგო და ჩემპიონატის დასრულებამდე სამი ტურით ადრე უპირატესობა 7 ქულამდე გაზარდა. მატჩამდე ორიოდე კვირით ადრე კი Marca-ში “სანტიაგო ბერნაბეუს” ექიმის, ნიკო მიჰიჩის ინტერვიუ გამოქვეყნდა.

მიჰიჩს ფეხბურთელებში სახვევების ტარების ტენდენციაზე ჰკითხეს. კითხვა კონკრეტულად “ბარსას” არ ეხებოდა, თუმცა მისმა პასუხმა ცეცხლზე ნავთი დაასხა:

“შეიძლება სტრატეგიულ თამაშებს ქმნიან, მაგიდის ფეხბურთს ხშირად თამაშობენ და მყესების ანთება აქვთ… ისევე, როგორც შეიძლება ნეგრეირასთვის ქრთამი არ ჰქონდეთ გადახდილი. არ ვიცი, რა ხდება, მაგრამ ნებისმიერმა ექიმმა იცის, რომ ვენებთან ყველაზე მარტივი წვდომა მტევნებსა და მაჯებზეა. მოდას არ ვენდობი; არ მგონია, რომ მოთამაშე ტრავმისთვის განკუთვნილ ნივთს უმიზეზოდ ატარებდეს”.

“ელ კლასიკოს” წინ რაფინიამ ამ ბოდვას ESPN-თან პირდაპირ უპასუხა:

“მთელი სეზონის განმავლობაში გარეშე პირები ყველანაირად ცდილობდნენ ჩვენს დესტაბილიზაციას. ბოლოს ის მოიფიქრეს, თითქოს სხეულში რაღაცას ხელებიდან ან მაჯებიდან ვიკეთებთ. ეს სრული სისულელეა – დოპინგ-ტესტებს მთელი სეზონი რეგულარულად გავდივართ და არავინაა ისეთი იდიოტი, რომ უპირატესობის მოსაპოვებლად მსგავსი რამ გააკეთოს”.

იმ 4-3 მოგებულ მატჩში რაფინიამ დუბლი შეასრულა, ერთ-ერთი გოლის შემდეგ კი სატელევიზიო კამერებთან მივიდა და მარჯვენა ხელზე გადახვეულ ლურჯ ბინტზე მიუთითა: “ეს ჟესტი იმიტომ გავაკეთე, რომ ხალხმა სისულელეების ლაპარაკი შეწყვიტოს და საკუთარ საქმეს მიხედოს“.

ტრავმები, PlayStation და ბენზემას სტილი: ლამინ იამალის ისტორია

ხელზე სახვევები გუნდისთვის დამახასიათებელ შტრიხად დღემდე რჩება. ერთ-ერთი მათგანი ლამინ იამალია. მსოფლიო ჩემპიონატის წინ საკუთარ YouTube არხზე გამოქვეყნებულ ვიდეოში მან ღიად მოყვა, თუ რატომ დაიწყო ბინტის ტარება:

“თავიდან სახვევის გაკეთება იმიტომ დამჭირდა, რომ PlayStation-ის თამაშისას გავბრაზდი, ტელევიზორის ეკრანს ხელი ჩავარტყი და თითები დავიზიანე. საკმაოდ შემისივდა, ამიტომ შეხვევა მომიწია. მერე შევამჩნიე, რომ ეს სახვევი ძალიან მიხდებოდა და კარიმ ბენზემას ვგავდი. მახსოვს, მეგობრები მეხუმრებოდნენ და KB9-ს მეძახდნენ. ამის შემდეგ სახვევი დავიტოვე, რადგან ვთვლი, რომ უბრალოდ მიხდება”.

ანალოგიური ისტორია ჰქონდა თავად ბენზემასაც – ტრავმის შემდეგ სახვევით კარგად თამაში დაიწყო და მოგვიანებით ის იღბლის მომტან თილისმად დაიტოვა.

გავი, კუბარსი და იღბლიანი თილისმა

მსგავსი მიზეზები აქვთ “ბარსელონას” სხვა ფეხბურთელებსაც:

• გავი: 22 წლის ნახევარმცველმა ხელის შეხვევა 2025 წლის იანვარში დაიწყო, როდესაც ვარჯიშზე თითი მოიტეხა და მატჩების ჩასატარებლად დამცავი ბინტი სჭირდებოდა. მას შემდეგ მან სახვევი გუნდის წარმატებული სერიის გამო, როგორც იღბლის მომტანი აქსესუარი, შეინარჩუნა.
• პაუ კუბარსი: ახალგაზრდა მცველი მსოფლიო ჩემპიონატზეც შეხვეული ხელით თამაშობდა (სადაც ტურნირის საუკეთესო ახალგაზრდა გახდა). მიზეზი მარჯვენა ცერა თითის დაცვა იყო, რომელიც მან ლა ლიგის ბოლო ტურში, “ალავესთან” დაიზიანა.
• პაუ ვიქტორი: “ბარსას” ყოფილმა ფორვარდმა, რომელიც ამჟამად “ბრაგაში” თამაშობს, ოთხი წლის წინ “საბადელში” ხელი მოიტეხა. დამცავი სახვევი მისთვისაც უცვლელ თილისმად იქცა.

სხვათა შორის, ასეთი ჩვევა მხოლოდ ფეხბურთელებს არ აქვთ – მაგალითად, “ლივერპულის” მთავარი მწვრთნელი ანდონი ირაოლა თითოეული მატჩის წინ ორივე ხელზე თითო თითს იხვევს, რა თქმა უნდა, იღბლისთვის.

გასახდელის წარმომადგენლები, რომლებმაც ინკოგნიტოდ დარჩენა ისურვეს, ამ შეთქმულების თეორიებს მხოლოდ იუმორით უყურებენ:

“ამაში აბსოლუტურად არაფერი საიდუმლო არ არის. დღეს ეს უბრალოდ სტილის ნაწილია, რომელიც ფოტოებზე კარგად ჩანს – ისევე, როგორც თმის სამაგრები ან NBA-ს მოთამაშეების მაჯის სახვევები. ბოლო ორი სეზონის წარმატების გათვალისწინებით, სულაც არ გამიკვირდება, ლამინ იამალი მარჯვენა შეხვეული ხელითა და ორი თითით კიდევ დიდხანს ვიხილოთ”.