ჩემპიონთა ლიგის პრევიუ: ბარსელონა – პარიზი

მოქმედი ჩემპიონი ბრძოლაში ერთვება. “ბარსელონას” ქალთა გუნდი უეფას ქალთა ჩემპიონთა ლიგის 2026/27 წლების თავგადასავალს დღეს, თბილისის დროით 23:00 საათზე, “ესტადი იოჰან კრუიფზე” “პარიზის” წინააღმდეგ მატჩით იწყებს.

პარიზულ გუნდს, რომელმაც გასულ სეზონში ევროპის მთავარი საკლუბო ტურნირის მერვედფინალამდე მიაღწია, შიდა ჩემპიონატში სამი ტური აქვს ჩატარებული და აქტივში ექვსი ქულა აქვს. პერე რომეუმ მეტოქე დაახასიათა როგორც “ფიზიკურად ძლიერი და პირდაპირი” გუნდი, რომლის სათამაშო სტილიც წლების განმავლობაში მკაფიოდ არის ჩამოყალიბებული.

მხოლოდ ერთი ურთიერთშეხვედრა

“ბარსელონა” და “პარიზი” ერთმანეთს აქამდე მხოლოდ ერთხელ, გასულ სეზონში შეხვდნენ. ჩემპიონთა ლიგის ჯგუფური ეტაპის მეექვსე ტურში კატალონიელები “სტად ჟან ბუენს” ესტუმრნენ და გამარჯვება მოიპოვეს. 15 000-ზე მეტი მაყურებლის თვალწინ პერე რომეუს გუნდმა მეტოქეს 2-0 სძლია.

იმ შეხვედრაში, რომელიც გასული წლის 17 დეკემბერს გაიმართა, “ბარსას” რიგებში გოლები ვიკი ლოპესმა და კაროლინ გრემ ჰანსენმა გაიტანეს. პირველ ტაიმში “პარიზმა” მეტოქის ტემპს ფეხი აუწყო, თუმცა შესვენების შემდეგ კატალონიელებს ანგარიშის კიდევ უფრო გაზრდა შეეძლოთ.

ტიტულის დაცვა

ახლა ტიტულის დაცვის დროა. “ბარსელონა” ეცდება, ქალთა ჩემპიონთა ლიგა ისტორიაში მეხუთედ მოიგოს. ევა პაიორმა, რომელმაც მატჩისწინა პრესკონფერენციაზე ასევე ისაუბრა, პირდაპირ განაცხადა:

“ჩვენი მიზანი ვარშავაში მოხვედრაა.”

სწორედ პოლონეთის დედაქალაქში გაიმართება მიმდინარე სეზონის ფინალი.

საკადრო ვითარებას რაც შეეხება, ბარძაყის ტრავმების გამო ვიკი ლოპესი და კიკა ნაზარეთი გუნდს ვერ დაეხმარებიან, თუმცა ირენე პარედესი სრულად გამოჯანმრთელდა და სამედიცინო შტაბისგან მწვანე შუქი მიიღო.