გაბრიელ ჟეზუსის დაუჯერებელი ისტორია: სან-პაულუს ქუჩების მოხატვიდან ბარსელონამდე

2014 წელი, ბრაზილიის მსოფლიო ჩემპიონატი. იმ ლეგენდარული მუნდიალის წინ, სადაც ახალგაზრდა ხამეს როდრიგესმა მსოფლიო აღაფრთოვანა, ნიდერლანდებმა ესპანეთზე რევანში აიღო, ხოლო ლეო მესი თავის პირველ მსოფლიო ფინალში გავიდა, 16 წლის გაბრიელ ჟეზუსი ფეხბურთელობაზე მხოლოდ ოცნებობდა.

ფოტოებზე, რომლებიც მან წლების წინ თავად გამოაქვეყნა, ჩანს, თუ როგორ ხატავდა ახალგაზრდა ბრაზილიელი სან-პაულუს ქუჩებს მუნდიალის წინ. როგორც თავად ამბობდა: “ყოველთვის მეოცნებე ვიყავი“, თუმცა ხშირად მისი ცხოვრება უფრო მეტად კოშმარს ჰგავდა.

რთული ბავშვობა და თავდადებული დედა

გაბრიელ ჟეზუსს მძიმე ბავშვობა ჰქონდა, რაც მამის წასვლით იყო გამოწვეული. The Players’ Tribune-სთვის მიცემულ ინტერვიუში მან ეს პერიოდი ასე გაიხსენა:

“არასდროს დამავიწყდება, როცა 8 ან 9 წლის ასაკში მეგობრებთან ერთად ფეხბურთს ვთამაშობდი და ვხედავდი, როგორ მოდიოდნენ მათი მამები ჩვენთან სათამაშოდ. ჩემს თავს ვეკითხებოდი: ‘სად არის მამაჩემი?'”

ოჯახში მამის არყოფნამ მთელი სიმძიმე დედას დააკისრა. ჟეზუსის თქმით, დედას გადარჩენისთვის წარმოუდგენელი შრომა უწევდა:

“ხანდახან მთელი დღის განმავლობაში დედას საერთოდ ვერ ვხედავდი. როდესაც სკოლაში წასასვლელად ვიღვიძებდი, ის უკვე წასული იყო. როცა დასაძინებლად ვწვებოდი, ის ჯერ კიდევ სხვების სახლებს ალაგებდა.”

გზა ევროპულ ელიტამდე

დედა ბრაზილიელის ცხოვრებაში უმთავრეს დასაყრდენად იქცა. გაბრიელის დებიუტი “პალმეირასის” პირველ გუნდში 17 წლის ასაკში შედგა. მშობლიურ კლუბში გატარებული ორი სეზონის შემდეგ მან ევროპაში უდიდესი ნახტომი გააკეთა და პეპ გვარდიოლას “მანჩესტერ სიტის” დაახლოებით 35 მილიონი ევროს სანაცვლოდ შეუერთდა. მანჩესტერში წარმატებული წლების შემდეგ ის მიკელ არტეტას “არსენალში” გადავიდა, სადაც პრემიერ ლიგის ჩემპიონობა კვლავ იზეიმა.

საკლუბო კარიერის პარალელურად, გაბრიელმა იმ ბიჭის ოცნებაც აისრულა, რომელიც სან-პაულუს ქუჩებს მსოფლიო ჩემპიონატისთვის ამზადებდა: მან ბრაზილიის ეროვნულ ნაკრებში სადებიუტო მატჩი ჩაატარა. 2018 წლის რუსეთის მუნდიალზე მან თავის კუმირთან, ნეიმართან ერთად ითამაშა, რომელთან ერთადაც 2016 წელს რიო-დე-ჟანეიროს ოლიმპიურ თამაშებზე ოქროს მედალიც მოიპოვა.

ახლა 29 წლის ბრაზილიელი ფორვარდი უკვე ბარსელონაშია და სამედიცინო შემოწმების წარმატებით გავლის შემდეგ ოფიციალურად გახდება “ბარსელონას” ფეხბურთელი – ეს არის სირთულეების დაძლევისა და დაუღალავი შრომის ისტორია ადამიანისა, რომელიც ყოველთვის დიდი მეოცნებე იყო.