ადეიემისა და ბისივუს სადებიუტო გოლები

ბაზელში სიახლეების დღე იყო. ენტონი გორდონის დებიუტის გარდა, ჰანსი ფლიკის გუნდის ორმა ახალმა სახემ კლუბში პირველი გოლები აღნიშნა. კარიმ ადეიემიმ პირველ ტაიმში ანგარიში გახსნა, ხოლო ჯესი ბისივუმ თვალის დახამხამებაში დუბლი შეასრულა და მატჩი საუკეთესოდ დაასრულა.

გოლი და საგოლე პასი ადეიემისგან

გერმანელმა მიმდინარე წინასასეზონო ეტაპზე თავისი საუკეთესო მატჩი ჩაატარა. პირველი ტაიმის მიწურულს, მან რაფინიას შესანიშნავი მოქმედებით ისარგებლა და შეტევა ძლიერი დარტყმით დააგვირგვინა, რამაც მეკარეს შანსი არ დაუტოვა. “ბორუსია დორტმუნდის” ყოფილმა ფეხბურთელმა “ბარსელონაში” პირველი გოლი გაიტანა.

თუმცა, მას ანგარიშზე კიდევ უფრო დიდი გავლენა უნდა მოეხდინა. მეორე ტაიმის დასაწყისში ის წინ გაიჭრა და შორეულ ძელთან ბურთი ჰამზა აბდელკარიმს ჩაუწოდა, რომელმაც ანგარიში 2-1 გახადა. ეგვიპტელისთვის ეს წინასასეზონო ეტაპზე მესამე გოლი იყო, ხოლო ადეიემიმ თამაში გოლითა და საგოლე გადაცემით დაასრულა. ის “ბარსელონას” სისტემაში სულ უფრო კომფორტულად და თავდაჯერებულად გამოიყურება.

ბისივუს დუბლი

ადეიემიმ 79 წუთი ითამაშა, სანამ ადგილს დასკვნითი ეტაპის ვარსკვლავს დაუთმობდა. ჯესი ბისივუმ ორ წუთზე ნაკლებ დროში ორი გოლი გაიტანა, რომელთაგან პირველი ნამდვილი ხელოვნების ნიმუში იყო. დანი ოლმომ ისეთი პასი გააკეთა, როგორიც მხოლოდ მას შეუძლია, დანარჩენი კი ბელგიელმა შეასრულა – ცენტრისკენ შეიწია და ცხრიანში აუღებელი დარტყმით “ბარსელონას” მაისურით თავისი პირველი გოლი გაიტანა.

მისი მეორე გოლი ლამინ იამალის ბრწყინვალე ინდივიდუალურ მოქმედებას მოჰყვა. მან ბისივუს ბურთი ფაქტობრივად გამზადებული მიართვა, შედეგად კი “ბარსელონამ” მეხუთე და ბოლო გოლი გაიტანა “ბაზელის” კარში. ეს დაუვიწყარი დღე იყო როგორც ადეიემისთვის, ასევე ბისივუსთვის, რომლებმაც უკვე იციან, თუ რას ნიშნავს “ბარსელონასთვის” გოლის გატანა.