“ბარსელონამ” 2026/27 წლების სეზონის გასვლითი ფორმა წარადგინა, რომელიც Nike-ისა და კობი ბრაიანტის ბრენდის თანამშრომლობით შეიქმნა. გასულ სეზონში დაწყებული პარტნიორობის პირველი ეტაპის შემდეგ, ეს მეორე წელი აძლიერებს სტრატეგიულ ალიანსს, რომელიც კონკურენტუნარიანობის, ამბიციისა და ბრწყინვალების საერთო ღირებულებებზეა აგებული.
კრეატიული კამპანია აგებულია იმ რწმენის იდეაზე, რომელიც შრომისმოყვარეობით, მიზანდასახულობითა და საკუთარი შესაძლებლობების ზღვრის გადალახვის მუდმივი ამბიციით მიიღწევა. ეს არის დამოკიდებულება, რომელიც ბუნებრივად ასახავს როგორც “ბარსელონას” კონკურენტულ იდენტობას, ისე კობი ბრაიანტის მემკვიდრეობას. ორივეს ერთი და იგივე შეუპოვარი მისწრაფება აერთიანებს: მუდმივი კონკურენცია კიდევ უფრო შორს წასასვლელად.
დიზაინის დეტალები და შთაგონება
ახალი ფორმა ამ აზროვნების ვიზუალური გამოხატულებაა. Kobe-ს ბრენდის ესთეტიკური სამყაროთი შთაგონებულ დიზაინში დომინანტური შავი ფერია – ესაა მიზანდასახულობისა და კონკურენტული ინტენსივობის სიმბოლო, რომელიც როგორც “ბარსელონას”, ისე კობი ბრაიანტის ბრენდს განსაზღვრავს. შავი ფერი მაისურის ქვედა ნაწილში თანდათანობით იისფერში გადადის, რაც მჭიდროდ არის დაკავშირებული ბრაიანტის სპორტულ კარიერასთან. ოქროსფერი დეტალები დიდი გამოწვევებისა და ტიტულებისკენ მუდმივ სწრაფვას ასახავს, ხოლო გრაფიკული ელემენტების სერია Kobe-ს ბრენდის იდენტობაზე დახვეწილ მინიშნებებს შეიცავს.
გამორჩეულ დიზაინერულ დეტალებს შორისაა გველის ტყავით შთაგონებული პატერნი, “ბარსელონას” ირიდისცენტული (მბზინავი, ფერების გადამსვლელი) ლოგო, კობის ლოგო მკერდზე და საყელოს შიგნით დამალული კობი ბრაიანტის ციტატა:
“დატოვე თამაში იმაზე უკეთეს მდგომარეობაში, ვიდრე დაგხვდა.”
ეს გზავნილი აერთიანებს სპორტისადმი მიდგომას, რომელიც ერთგულებაზე, თვითგანვითარებასა და მემკვიდრეობაზეა დაფუძნებული. Nike AeroSwift-ისა და Dri-FIT ADV ტექნოლოგიების გამოყენებით შექმნილი ახალი ფორმა შეჯიბრებებში მაქსიმალური შედეგის მისაღწევადაა შექმნილი. ის აერთიანებს სიმსუბუქეს, ჰაეროვნებასა და კომფორტს, რათა დაეხმაროს როგორც მამაკაცთა, ისე ქალთა გუნდებს უმაღლეს დონეზე თამაშში.
კამპანია, რომელიც კონკურენტულ აზროვნებაზეა აგებული
ახალი გასვლითი ფორმის პრეზენტაციას თან ახლავს გლობალური კამპანია, რომელიც ყოველი დიდი მიღწევის მიღმა არსებულ მენტალურ სიძლიერეზეა ფოკუსირებული. აუდიოვიზუალური კონტენტის, ფოტოგრაფიის, ციფრული თხრობისა და საერთაშორისო აქტივობების მეშვეობით, კამპანია ნარატივის ცენტრში თავდაჯერებულობას, მიზანდასახულობასა და ამბიციას აყენებს.
შემოქმედებითი კონცეფცია აძლიერებს “ბარსელონასა” და Kobe-ს ბრენდს შორის მიმდინარე პარტნიორობას და ქმნის გამორჩეულ ვიზუალურ იდენტობას, რომელიც სცდება მხოლოდ მაისურს და გულშემატკივართა ახალ თაობასთან როგორც მოედანზე, ისე მის მიღმა ამყარებს კავშირს.
2026/2027 წლების ახალი გასვლითი ფორმის კამპანიის სახეები აიშა კამარა, ალეხანდრო ბალდე, კლაუდია პინა, ევა პაიორი, ფრენკი დე იონგი, გავი, კიკა, მარკ ბერნალი, პატრი გიხარო და პედრი არიან. ფორმა ექსკლუზიურად ხელმისაწვდომია პარასკევიდან, 24 ივლისიდან, “ბარსელონას” ონლაინ მაღაზიაში, Barça Store-ებსა და Nike-ის სავაჭრო წერტილებში. ახალი ფორმის დებიუტი მოედანზე წინასასეზონო მზადების დროს, პირველი გუნდის საწყის მატჩებში შედგება.
კომენტარები (0)