2010 წელს “ბარსელონას” ასევე 8 მსოფლიო ჩემპიონი ჰყავდა, 2011 წელს კი კლუბმა ჩემპიონთა ლიგა მოიგო.
რამდენიმე კვირაში ჰანსი ფლიკის განკარგულებაში “ბარსელონას” რვა ფეხბურთელი მსოფლიო ჩემპიონის სტატუსით დაბრუნდება: ჟოან გარსია, ერიკ გარსია, პაუ კუბარსი, გავი, პედრი, დანი ოლმო, ფერან ტორესი და ლამინ იამალი. ეს რიცხვი კატალონიური კლუბის ისტორიაში ერთ ძალიან განსაკუთრებულ პრეცედენტს იმეორებს.
ამდენი სანაკრებო მოთამაშის ყოლამ შესაძლოა გარკვეული შეშფოთება გამოიწვიოს იმ ფიზიკური თუ მენტალური გადაღლის გამო, რაც მსოფლიო ჩემპიონატზე თამაშს ახლავს თან. ასევე, უნდა ვაღიაროთ, რომ მოდუნების რისკიც არსებობს. თუმცა, ისტორია ოპტიმიზმის საფუძველს გვაძლევს. 2010 წლის პრეცედენტი ამტკიცებს, რომ გუნდში ბევრი მსოფლიო ჩემპიონის ყოლა “ბარსელონასთვის” პრობლემა არ ყოფილა – პირიქით.
2010 წელს, სამხრეთ აფრიკის მსოფლიო ჩემპიონატზე, კატალონიურ კლუბს შემადგენლობაში ასევე 8 მსოფლიო ჩემპიონი ჰყავდა: ვიქტორ ვალდესი, ჟერარ პიკე, კარლეს პუიოლი, სერხიო ბუსკეტსი, ჩავი ერნანდესი, ანდრეს ინიესტა, პედრო როდრიგესი და დავიდ ვილია. ეს თაობა “ბარსელონაში” ესპანეთის ისტორიაში პირველი მუნდიალის მოგების შემდეგ დაბრუნდა და დაღლილობის შეტყობის ნაცვლად, მომდევნო სეზონი ბრწყინვალედ ჩაატარა.
2010/11 წლების სეზონში, პეპ გვარდიოლას გაწვრთნილმა გუნდმა ლა ლიგა მოიგო, სეზონი კი უემბლიზე ჩემპიონთა ლიგის თასის აღმართვით დააგვირგვინა. ფინალში მათ “მანჩესტერ იუნაიტედი” დამაჯერებლად დაამარცხეს მატჩში, რომელსაც ბევრი იმ დროინდელი “ბარსელონას” ერთ-ერთ საუკეთესო გუნდურ პერფორმანსად მიიჩნევს.
ახლა, 16 წლის შემდეგ, ისტორია შეიძლება განმეორდეს. ჰანსი ფლიკი მიიღებს რვა ფეხბურთელს, რომლებსაც მსოფლიო ჩემპიონობა უდიდეს თავდაჯერებულობას მატებს. გარდა ამისა, საინტერესოა ის გარემოებაც, რომ ესპანეთისთვის ორივე მუნდიალზე გადამწყვეტი გოლები “ბარსელონას” ფეხბურთელებმა გაიტანეს: ანდრეს ინიესტამ 2010 წელს და ფერან ტორესმა 2026 წელს.
მუხტი უნდა იყოს დომინანტური საკლუბო სეზონებისთვის
რაც მთავარია ბიჭები დაკაცებულები ჩამოვლენ.