ისტორიული სეზონის სტატისტიკა

“ბარსელონამ” ლა ლიგაში საკუთარ მოედანზე ისტორიული სეზონი ჩაატარა. საკუთარი გულშემატკივრების წინაშე მოპოვებულმა გამარჯვებების სრულმა სერიამ “ბლაუგრანას” შესაძლო 57-დან 57 ქულა მოუტანა “ესტადი იოჰან კრუიფზე”, “ესტადი ოლიმპიკსა” და, რა თქმა უნდა, “სპოტიფაი კამპ ნოუზე” გამართულ შეხვედრებში.

19-დან 19: ისტორიული მაქსიმუმი

შინ გამართულ 19 მატჩში 19 გამარჯვება ნიშნავს იმას, რომ ჰანსი ფლიკის გუნდს საკუთარ მოედანზე არცერთი ქულა არ დაუკარგავს. ეს გამარჯვებები სამ სხვადასხვა სტადიონზე განაწილდა: ორი “ესტადი იოჰან კრუიფზე”, სამი “ესტადი ოლიმპიკზე” და 14 “სპოტიფაი კამპ ნოუზე”.

57 გატანილი და 10 გაშვებული გოლი

შინ ჩატარებულ 19 მატჩში ჰანსი ფლიკის გუნდმა თავისი შემტევი პოტენციალი 57 გატანილი გოლით აჩვენა, რაც საშუალოდ მატჩში სამ გოლს უდრის – თითო გოლი თითოეულ ქულაზე. 48 გოლი საჯარიმო მოედნიდან იქნა გატანილი, ხოლო 9 – საჯარიმოს გარედან. სამი გოლი პენალტით გავიდა, 12 – კუთხურიდან, ოთხი – თავური დარტყმით, 24 – მარჯვენა ფეხით, ხოლო 29 – მარცხენათი.

“ბარსელონას” სიმყარე დაცვაში საკუთარ მოედანზე მათი წარმატების საკვანძო ფაქტორი იყო; გუნდმა შინ, ჩემპიონატში მხოლოდ 10 გოლი გაუშვა, რაც საშუალოდ მატჩში 0.53 გოლს შეადგენს.

10 მშრალი მატჩი

ამ ბრწყინვალე თავდაცვით მაჩვენებელს ხელი შეუწყო 10-მა მშრალმა მატჩმა: “ვალენსიას”, “ხეტაფეს”, “ატლეტიკ ბილბაოს”, “ოსასუნას”, “ოვიედოს”, “მალიორკას”, “ლევანტეს”, “რაიო ვალეკანოს”, “სელტასა” და “რეალ მადრიდის” წინააღმდეგ, რამაც მეკარე ჟოან გარსია სამორას ჯილდოს მოპოვების მთავარ კანდიდატად აქცია.

3 ქამბექი

მიუხედავად საკუთარ მოედანზე არსებული შესანიშნავი მაჩვენებლისა, ზოგიერთ მატჩში “ბარსელონას” ანგარიშში ჩამორჩენის შემდეგ თამაშის შემოტრიალება მოუწია, რაც მათ “ატლეტიკო მადრიდის”, “ალავესისა” და “რეალ სოსიედადის” წინააღმდეგ შეძლეს.

13 სხვადასხვა გოლეადორი

“ბარსელონას” სიძლიერეს საკუთარ მოედანზე ხელი შეუწყო ჰანსი ფლიკის განკარგულებაში მყოფი შემტევი ფეხბურთელების მრავალფეროვნებამ. შინ გოლი 13-მა სხვადასხვა მოთამაშემ გაიტანა, სიას კი რაფინია ლიდერობს 11 გოლით, რომელსაც ფერან ტორესი და ლამინ იამალი მოსდევენ 9-9 გოლით.

რობერტ ლევანდოვსკიმ და დანი ოლმომ 6-6 გოლი გაიტანეს, ფერმინმა – ოთხი, რაშფორდმა – სამი, ორ-ორი გოლი რონალდ არაუხოს, მარკ ბერნალისა და ჟოაუ კანსელუს ანგარიშზეა, ხოლო თითო-თითო გოლი კუნდემ, პედრიმ და ფრენკი დე იონგმა გაიტანეს.

1,440 წუთი

ჟოან გარსია არის ის ფეხბურთელი, რომელმაც ამ სეზონში საკუთარ მოედანზე ყველაზე მეტი, 1,440 წუთი ითამაშა. მას მოსდევს ერიკ გარსია 1,364 წუთით; ჟიულ კუნდე 1,260 წუთით; ჟერარ მარტინი 1,254 წუთით და პაუ კუბარსი 1,239 წუთით.

რაც შეეხება სასტარტო შემადგენლობას, ერიკ გარსია და ჟოან გარსია ძირითად თერთმეტეულში იყვნენ 19 მატჩიდან 16-ში, ჟერარ მარტინი — 15-ში, პაუ კუბარსი — 14-ში, ხოლო ჟიულ კუნდე და ლამინ იამალი – 13-ში.

6 დიდი ანგარიშით მოგება

მოპოვებულ 19 გამარჯვებას შორის იყო რამდენიმე დიდი ანგარიშით მოგებული შეხვედრაც. ყველაზე დიდი სხვაობით გამარჯვება დაფიქსირდა “ვალენსიასთან” მატჩში, რომელიც ანგარიშით 6-0 დასრულდა ფერმინ ლოპესის, რაფინიასა და რობერტ ლევანდოვსკის დუბლების წყალობით.

ასევე იყო გამარჯვება “სევილიასთან” ანგარიშით 5-2 რაფინიას ჰეთ თრიქით, 4-1 “ვილიარეალთან” ლამინის სამი გოლით და 4-0 “ატლეტიკ ბილბაოსთან”. და არ უნდა დაგვავიწყდეს საკუთარ მოედანზე “რეალ მადრიდთან” მოპოვებული გამარჯვება ანგარიშით 2-0, რომელმაც “ბარსელონას” ლა ლიგის 29-ე ტიტული გაუნაღდა.