სერჟი რობერტო კარნისერი (რეუსი, ტარაგონა, 1992) “ბარსელონას” 2006 წელს “ბლაუგრანას” პირველ გუნდში თამაშის ოცნებით შეუერთდა. მან ეს ოცნება არაერთხელ აიხდინა, პირველი კაპიტანიც კი გახდა და პუიოლის, ჩავის, ინიესტასა და მესის მსგავსი ლეგენდების კვალს გაჰყვა.

“ბარსელონას” არსის ნამდვილი განსახიერება, სერჟი რობერტო კლუბს 2006 წელს, 14 წლის ასაკში შეუერთდა, როდესაც “ხიმნასტიკ ტარაგონას” ახალგაზრდული სისტემიდან “ლა მასიაში” გადმოვიდა. ყველა ასაკობრივი ეტაპის გავლისა და ლუის ენრიკეს მიერ გაწვრთნილ სარეზერვო გუნდში გამორჩეული ასპარეზობის შემდეგ, რომელიც სეგუნდა დივიზიონში თამაშობდა, მისი დებიუტი პირველ გუნდში 2010 წლის 10 ნოემბერს შედგა, როდესაც ესპანეთის თასის მატჩში “სეუტას” წინააღმდეგ ბოლო 25 წუთი ითამაშა.

მრავალმხრივ მოთამაშეს ეს 2010/11 წლების სეზონი არასდროს დაავიწყდება. სწორედ მაშინ მოირგო მან პირველად მთავარი გუნდის მაისური ლა ლიგაში, ესპანეთის თასსა და ჩემპიონთა ლიგაზე – ამ ევროპულ ტურნირზე მისი სადებიუტო გამოჩენა “რეალ მადრიდის” წინააღმდეგ ნახევარფინალში შედგა, რომელშიც “ბლაუგრანამ” გაიმარჯვა. საბოლოოდ, 2013/14 წლების სეზონიდან მისი გამოყენება გუნდის როტაციაში დაიწყო, ხოლო ნახევარდაცვასა და ფლანგის მცველის პოზიციაზე თამაშის უნარმა მას 2015/16 წლების სეზონში “ბლაუგრანას” სასტარტო თერთმეტეულში ადგილი დაუმკვიდრა.

თავისი ბუნებით შემტევმა ნახევარმცველმა, სხვადასხვა პოზიციასთან ადაპტაციის უნარის წყალობით, თავი ისე დაიმკვიდრა, რომ ყველა მწვრთნელი მას შემადგენლობის მნიშვნელოვან წევრად მიიჩნევდა. იგი იყო სამაგალითო ფეხბურთელი, რომელიც ყოველთვის მზად იყო, გუნდს იქ დახმარებოდა, სადაც ეს საჭირო გახდებოდა.

რაც შეეხება სერჟი რობერტოს მიერ “ბარსელონას” მაისურით გატანილ გოლებს, ერთი მათგანი განსაკუთრებულად შევიდა ისტორიაში. ეს იყო 2017 წლის 8 მარტს, როდესაც მისმა ბოლო წამებზე გატანილმა გოლმა “სპოტიფაი კამპ ნოუზე” პსჟ-სთან ქამბექი (6-1) დააგვირგვინა ჩემპიონთა ლიგის მერვედფინალში, გასვლაზე 0-4 წაგების შემდეგ. ეს დაუვიწყარი მომენტი “ბლაუგრანას” კოლექტიურ მეხსიერებაში სამუდამოდ აღიბეჭდა.

მას შემდეგ, რაც 2024 წელს კლუბში მისი ეპოქა დასრულდა, მან კარიერა იტალიურ “კომოში” განაგრძო.

კარიერა

სეზონები კლუბში: 2010-2024
თამაში: 438
გოლი: 23

ტიტულები

1 მსოფლიოს საკლუბო ჩემპიონატი: 2015/16
2 ჩემპიონთა ლიგა: 2010/11, 2014/15
1 ევროპის სუპერ თასი: 2015/16
7 ლა ლიგა: 2010/11, 2012/13, 2014/15, 2015/16, 2017/18, 2018/19, 2022/23
6 ესპანეთის თასი: 2011/12, 2014/15, 2015/16, 2016/17, 2017/18, 2020/21
4 ესპანეთის სუპერ თასი: 2013/14, 2016/17, 2018/19, 2022/23
2 კატალონიის თასი: 2012/13, 2013/14
2 კატალონიის სუპერ თასი: 2014/15, 2017/18