ისტორია ბარსელონას მხარესაა

“ბარსელონა” ზამთრის არდადეგებს ლა ლიგის ლიდერის სტატუსით ხვდება. პირველი წრის დასრულებამდე ერთი ტურია დარჩენილი, მაგრამ ვინაიდან ჰანსი ფლიკის გუნდი “რეალ მადრიდს” 4 ქულით უსწრებს, დანამდვილებით ვიცით, რომ პირველ წრესაც კატალონიელები მოიგებენ.

აქამდე “ბარსელონა” ესპანეთის “ზამთრის ჩემპიონი” 27-ჯერ გამხდარა, საიდანაც კატალონიელებმა საბოლოო გამარჯვება 17-ჯერ იზეიმეს. ბოლო 13 ასეთი შემთხვევიდან კი “ბლაუგრანამ” ლა ლიგა 9-ჯერ მოიგო.

ბოლო დეკადის განმავლობაში მხოლოდ ორჯერ მოხდა, როდესაც ლა ლიგის ჩემპიონი ის გუნდი გახდა, რომელიც ზამთრის არდადეგების დროს გათამაშებას არ ლიდერობდა. ერთხელ ეს “რეალ მადრიდმა” მოახერხა კორონავირუსის სეზონის დროს, გასულ სეზონში კი – “ბარსამ”.

ლა ლიგის განვლილ 94 გათამაშებაში 51-ჯერ მოხდა, როდესაც “ზამთრის ჩემპიონმა” ლიდერობა ბოლომდე შეინარჩუნა და ტურნირი მოიგო.

ისტორია ჰანსი ფლიკის გუნდის მხარესაა და გერმანელი სპეციალისტი შეეცდება, გააკეთოს ის, რაც 2008 წლის შემდეგ მხოლოდ “ბარსას” გამოსდის – გახდეს ესპანეთის ჩემპიონი ზედიზედ ორჯერ.