რას მოიტანს რაშფორდი ბარსელონაში და როგორ მოერგება ფლიკის სისტემას?

მარკუს რაშფორდის “ბარსელონაში” გადასვლა დიდ ინტერესს იწვევს – უკანასკნელი წლები “მანჩესტერში” რთული აღმოჩნდა, თუმცა “ასტონ ვილაში” იჯარით გატარებული პერიოდი მისთვის გარდამტეხი იყო. Football España ინგლისურ გამოცემა Stretty News-ის რედაქტორს, იზაბელ რაიანს ესაუბრა, რათა გაერკვია: რას შეიძლება ველოდოთ რაშფორდისგან კატალონიურ გრანდში?

ბრწყინვალე 2022/23 და მძიმე ჩავარდნა

“ბარსელონას” გულშემატკივრებმა რაშფორდი 2023 წლის ევროპალიგის მატჩებში კარგად დაიმახსოვრეს, როდესაც მან ჩავი ერნანდესის გუნდის წინააღმდეგ ბრწყინვალედ იასპარეზა. იმ სეზონში მან 30 გოლი გაიტანა – კარიერის საუკეთესო მაჩვენებელი. ამის შემდეგ, “იუნაიტედმა” მას მაღალი ხელფასის კონტრაქტი შესთავაზა, მაგრამ სწორედ აქ დაიწყო რეგრესი.

2023/24 სეზონში რაშფორდმა 22 გოლით ნაკლები გაიტანა. მისი თვითდაჯერებულობა აშკარად შემცირდა და მოედანზე ხშირად გაღიზიანებულად ჩანდა. მიუხედავად იმისა, რომ სასტარტო შემადგენლობაში რჩებოდა, ფორმის დაბრუნება ვერ შეძლო.

სიტუაცია “ასტონ ვილაში” და ხელახლა გაცოცხლებული იმედი

იანვარში რაშფორდი იჯარით გადავიდა “ასტონ ვილაში”. მიუხედავად იმისა, რომ თავად “ბარსელონაში” სურდა გადმოსვლა, კლუბის ფინანსურმა მდგომარეობამ ეს ვერ გახადა შესაძლებელი. “ვილაში” ჩატარებულ 17 მატჩში მან 4 გოლი გაიტანა და 6 საგოლე გადაცემა გააკეთა. ტრავმის გამო სეზონის ბოლოს რამდენიმე თამაში გამოტოვა.

მისი ყველაზე დასამახსოვრებელი გამოსვლა ჩემპიონთა ლიგის მეოთხედფინალში, პსჟ-ს წინააღმდეგ, იყო, სადაც მან 76 წუთი ითამაშა, 4 დრიბლინგი, 4 საკვანძო პასი, 2 შექმნილი საგოლე შანსი და 1 ასისტი მიითვალა. ამ მატჩმა დაადასტურა, რომ რაშფორდს კვლავ შეუძლია დიდი სცენაზე თავის გამოჩენა.

ფლიკი მოითხოვს დისციპლინას – შეტევა და დაცვაში ჩართვა კრიტიკულია

რაშფორდს შეტევაში ბუნებრივად გააჩნია ტალანტი – განსაკუთრებით მარცხენა ფლანგზე თამაშისას. მისი სისწრაფე, ტექნიკა და დრიბლინგი მოწინააღმდეგის დაცვისთვის დიდ სირთულეს ქმნის, თუმცა ამ პოზიციაზე ფლანგის დაცვაში ჩართვა და მაღალი ტემპის პრესინგი აუცილებელია.

ჰანსი ფლიკმა უკვე აცნობა რაშფორდს, რომ მისი დაცვითი ძალისხმევა უნდა გაუმჯობესდეს. ინგლისელს ხშირად აკრიტიკებდნენ იმაზე, რომ უარს ამბობდა მებრძოლ და აქტიურ დაცვით მოქმედებებზე. სოციალურ ქსელებში ხშირად ვრცელდება ვიდეო 2023 წლის FA Cup-ის ფინალიდან, სადაც რაშფორდი თავიდან იცილებს ორთაბრძოლას – ეს ფაქტი ბევრისთვის სიგნალია მის ნაკლებ მებრძოლ ხასიათზე.

შეიძლება იყოს ცენტრალური თავდამსხმელიც?

რაშფორდი ცენტრფორვარდის პოზიციაზეც თამაშობს. მას შესანიშნავი დარტყმა აქვს, მაგრამ ხშირად პოზიციურად იკარგება – მიდრეკილია ფლანგებზე გადასვლისკენ, რაც შესაძლოა გუნდური სტრუქტურა დააზიანოს. ჰაერი სუსტი მხარეა – “Transfermarkt”-ის მიხედვით, კარიერაში მხოლოდ 9 გოლი აქვს თავით გატანილი.

პიროვნული მხარე – რთული რეალობა

რაშფორდი ხშირად ექცევა მედიის ყურადღების ცენტრში – როგორც პოზიტიურად, ისე ნეგატიურად. არსებობს დაუსაბუთებელი კრიტიკა, მაგრამ არის ფაქტებიც: ერთ-ერთი სკანდალი – ბელფასტის ღამის კლუბში გართობა და შემდეგ “ავადმყოფობის” მიზეზით ვარჯიშის გაცდენა – აშკარა პროფესიონალიზმის ნაკლებობას უსვამს ხაზს.

მეორე მხრივ, მისი ქველმოქმედება – ბავშვთა შიმშილის წინააღმდეგ კამპანია, COVID-19-ის დროს მოწყვლად ჯგუფებზე ზრუნვა – გვიჩვენებს, რომ ეს არის ადამიანი, რომელმაც საკუთარი გავლენა მნიშვნელოვანი სოციალური მიზნებისთვის გამოიყენა.

შეფასება: გაამართლებს თუ არა “ბარსელონაში”?

იზაბელ რაიანის აზრით:

“პირადად მე ვფიქრობ, რომ რაშფორდი “ბარსელონაში” წარმატებას მიაღწევს. მან ძალიან იბრძოლა კულისებს მიღმა ამ ტრანსფერისთვის და ახლა ისეთ გარემოში აღმოჩნდება, სადაც ტიტულების მოგება რეალური შესაძლებლობაა – ეს კიდევ უფრო მეტ მოტივაციას მისცემს.”

“”არსელონაში” ის ისეთ გარემოში მოხვდება, რომელიც სრულად განსხვავდება “მანჩესტერისგან”. ისეთ ფეხბურთელებთან ერთად თამაში, როგორებიც არიან ლამინ იამალი და რაფინია, და არა იმის მცდელობა, რომ იხსნა საკუთარი კლუბის კრიზისული მემკვიდრეობა – ეს შანსია, რომელსაც ორივე ხელით უნდა ჩაეჭიდოს.”