“ბარსელონას ქომაგი ვარ; ვიმედოვნებ, ჩემპიონთა ლიგას მოიგებენ” | ხორხე სამპაოლი

ბარსას გაწვრთნა? ეს შორეული პერსპექტივაა, მაგრამ ბარსელონას თამაშებს გულშემატკივრის რანგში ვუყურებ. ვიმედოვნებ, ისინი ჩემპიონთა ლიგასა და ლა ლიგას მოიგებენ.

2017 წელს კატალონიურ გრანდს ჩემთვის ოფიციალური წინადადებით არ მოუმართავს. თანაც, არგენტინის ნაკრებიდან შემოთავაზება უკვე მქონდა.

კოპა დელ რეის ფინალსა და ჩემპიონთა ლიგის ნახევარფინალს ვუყურე. ასევე, მინდა, ინტერთან განმეორებით მატჩს დავესწრო.

ჰანსი ფლიკის ბარსა ბუნებრივი და თავისუფალია. მჯერა, რომ ეს ფეხბურთელები წნეხის გარეშე თამაშობენ, რაც რთულია. ამ გუნდს აქვს იარაღი, რომელიც ბურთის კარგად ფლობასა და მეტოქისთვის ნებისმიერ მომენტში ზიანის მიყენებას გულისხმობს. ბარსელონას ძლიერი მენტალიტეტი აქვს და მატჩების შემოტრიალება შეუძლია.

ბევრ გუნდს ბურთის ფლობა არ სურს და უბრალოდ იმედოვნებენ, რომ მეტოქე შეცდება. ეს ფილოსოფია არ მომწონს – არ მიყვარს, როცა რაღაცას ელოდებიან, ინიციატივა საკუთარ თავზე უნდა აიღო.

გაკვირვებული ვარ, რომ ფლიკმა ასეთ მოკლე დროში გუნდი დიდებულად აათამაშა. ვფიქრობ, ამ პროექტში სიმწიფე გამოიკვეთა, რაც გერმანელს დაეხმარა, მაგრამ ეს, რა თქმა უნდა, თავისი დამსახურებაა.

პედრი, ფერმინი, დე იონგი, იამალი და რაფინიაც ისეთ გადაწყვეტილებებს იღებენ, როგორიც ეროვნულ გუნდში მათგან არ გვინახავს – ეს მწვრთნელის გარშემო აგებულ კონცეფციასთან და იმ ემოციურ-სოციალურ კავშირებთანაა დაკავშირებული, რომელიც ბარსაში შეიქმნა.

ამჟამად ბარსელონა, პარი სენ-ჟერმენთან ერთად, საუკეთესო გუნდია. ლუის ენრიკესაც ჰყავს მოთამაშეები, რომლებიც სტაბილურობას ინარჩუნებენ. ვფიქრობ, პსჟ ბარსაზე სოლიდურია, მაგრამ ისეთი კრეატიული არაა, როგორიც ფლიკის კოლექტივი, მიუხედავად იმისა, რომ ფრანგებს დემბელე და კიდევ რამდენიმე ფეხბურთელი ჰყავთ. ბარსელონასა და პსჟ-ს ბურთის ქონის არ ეშინიათ.

როცა დიდი ინტენსივობით უტევ, დაცვაში ხარვეზები ნორმალურია. ამ დროს მეტოქე მხოლოდ იმ სივრცეზეა ფოკუსირებული, რომელსაც ბარსა ტოვებს. ინტერთან მატჩში სწორედ ეს მოხდა, ისევე, როგორც რეალ მადრიდთან.

მეტოქე ხვდება, რომ თავი თუნდაც 8 კაცით დაიცვას, ბარსელონა მათ კართან მაინც მიაღწევს. ზოგჯერ ემოციები იმდენად დიდია, რომ მოთამაშეებს არ შეუძლიათ, ბარსას აწეულ დაცვას გაუმკლავდნენ.

შესაძლოა, ახლა, საკუთარ მოედანზე, ინტერი მიხვდეს, რომ ბარსელონას მაღალი ხაზის გარღვევა არა მხოლოდ ფლანგებიდან, არამედ სიღრმიდანაც შეიძლება, და ამის შესრულებას შეეცადოს.

არ მგონია, რომ იტალიაში გასამართი მატჩი განსხვავებული იქნება. ვფიქრობ, შეხვედრა იგივე სცენარით წარიმართება, რადგან ბარსელონა ყველგან ერთნაირად თამაშობს – მნიშვნელობა არ აქვს, სად არიან.