რუდიგერს ლა ლიგის ელ კლასიკოს გამოტოვება ემუქრება

ესპანეთის თასის ფინალი “ბარსელონას” გამარჯვებით დასრულდა (3-2), თუმცა “რეალ მადრიდისთვის” ცუდი ამბები ამით არ მთავრდება.

გუშინ გამართულ “ელ კლასიკოში” ტრავმები მიიღეს “ბლანკოსის” წამყვანმა ფეხბურთელებმა, ვინისიუს ჟუნიორმა და ანტონიო რუდიგერმა, ამ უკანასკნელს კი ხანგრძლივი დისკვალიფიკაციაც ემუქრება.

შეხვედრის მთავარი არბიტრის, დე ბურგოს ბენგოეჩეას მატჩისშემდგომი ანგარიშით დასტურდება, რომ რუდიგერმა მას ბოთლი ესროლა, რომელიც მსაჯს ასცდა. გერმანელი მცველი არბიტრის მიმართ აგრესიით ამის შემდეგაც გამოირჩეოდა.

ესპანური მედიის ცნობით რუდიგერს 4-დან 12 მატჩამდე დისკვალიფიკაცია ემუქრება და ამ ტიპის სასჯელი ლა ლიგაზეც ვრცელდება. ეს კი ნიშნავს იმას, რომ დიდი შანსია, “რეალ მადრიდის” ძირითადმა მცველმა 11 მაისს ესპანეთის ჩემპიონატში გასამართი “ელ კლასიკო” გამოტოვოს.

გუშინ წითელი ბარათები მიიღეს ჯუდ ბელინგემმა და ლუკას ვასკესმაც, მაგრამ მოსალოდნელია, რომ მათ შედარებით მსუბუქი სასჯელი შეხვდებათ, რომელიც ლა ლიგაზე არ გავრცელდება.