სანაკრებო ბატალიების გამო “ბარსელონას” პირველ გუნდს ფეხბურთელების უმეტესობა აკლია. ისინი, ვინც გარკვეული მიზეზების გამო მონაწილეობას არ იღებენ ეროვნული ნაკრებების მატჩებში, დღეს “სიუტატ ესპორტივას” ბაზაზე “ბარსა ბ”-ს მოთამაშეებთან ერთად გამოცხადდნენ და მორიგი სავარჯიშო სესია ჩაატარეს.
“ბარსამ” კვირის რიგით მეორე ვარჯიში დღეს, ესპანეთის დროით 11:00 საათზე ჩაატარა. ვარჯიშს არ ესწრებოდა პირველი გუნდის 14 ფეხბურთელი, ამიტომ ინიესტს, მაქსველს, პინტოსა და ფონტასს პარტნიორობა ეუსებიო საკრსტანის შეგირდებმა გაუწიეს. მათ მეთვალყურეობას “ბარსა ბ”-ს მწვრთნელთან ერთად, ხოსეპ გვარდიოლაც უწევდათ.
მასკერანო, რომელიც გუშინ გიმნასტიკის დარბაზში განცალკევებით ვარჯიშობდა, საკუთარი ნაკრების დასახმარებლად გაემგზავრა. შეგახსენებთ, რომ არგენტინელი დისკვალიფიკაციის გამო გამოტოვებს ნაკრების პირველ შეხვედრას, რომელიც 7 ოქრომბერს გაიმართება.
პირველი გუნდის ფეხბურთელების დაბრუნებამდე, “ბარსელონა” კიდევ ორ ვარჯიშს ჩაატარებს სარეზერვო გუნდთან ერთად. ვარჯიშები ხვალ და ზეგ, ესპანეთის დროით 11:00 საათზე გაიმართება. ამის შემდეგ გუნდი 3 დღით დაისვენებს.
