ოქროს ბურთი – ვის რამდენი?

გუშინ ოქროს ბურთის დაჯილდოება გაიმართა. ყველაზე მეტი, 3 ჯილდო “ბარსას” ფეხბურთელებმა აიღეს, მაგრამ უმთავრესი პრიზი, მამაკაცების “ოქროს ბურთი” “რეალ მადრიდის” ფრანგ ვარსკვლავს, ქარიმ ბენზემას შეხვდა. ვერაფერს იტყვი, ნამდვილად დამსახურებულად.

გუშინდლის წყალობით “რეალ მადრიდი” “ბარსელონას” ოქროს ბურთების რაოდენობით გაუთანაბრდა, თუმცა მხოლოდ ფორმალურად. ესპანური გრანდების აქტივში 12-12 ოქროს ბურთია, რაც, რა თქმა უნდა, რეკორდია.

თუმცა თუ ჩვენ ყურადღებას მივაქცევთ იმას, თუ რომელ გუნდებში თამაშის გამო იგებდნენ ფეხბურთელები ოქროს ბურთებს, აქ “ბარსა” დიდი უპირატესობითაა წინ გაჭრილი. 2000 წელს ჯილდო ლუიშ ფიგუმ მიიღო, რისი მიზეზიც მისი “ბარსელონაში” თამაშის დროინდელი წარმატებებია; 2002 წელს საუკეთესოდ რონალდო დასახელდა, მიზეზი კი ის თამაშია, რომელიც მან “ინტერის” ფეხბურთელობის დროს აჩვენა; 2006 წელს ოქროს ბურთის მფლობელი ფაბიო კანავარო გახდა, მიზეზი კი ის თამაშია, რომლის დროსაც ის “იუვეს” ფეხბურთელი იყო. სამივე ამ შემთხვევაში ფეხბურთელებმა ჯილდო იმ დროს ჩაიბარეს, როდესაც “რეალ მადრიდის” ფეხბურთელები იყვნენ.

საპირისპირო არასდროს მომხდარა, ანუ “რეალ მადრიდში” თამაშით დამსახურებული ოქროს ბურთი სხვა გუნდზე არასდროს გაფორმებულა. ეს ნიშნავს, რომ “რეალ მადრიდში” თამაშით ფეხბურთელებმა 9 ოქროს ბურთი მოიგეს.

“ბარსელონაში” სხვაგვარი სიტუაციაა. 1973 წელს “ბარსამ” იოჰან კრუიფის ოქროს ბურთი “აიაქსს” “წაართვა”. სამაგიეროდ “ბარსელონას” ოქროს ბურთები აქტივში ჩაიწერეს “რეალ მადრიდმა” (ლუიშ ფიგუ, 2000 წელი) და “პარი სენ-ჟერმენმა” (ლიონელ მესი, 2021 წელი). გამოდის, “ბარსელონაში” თამაშის გამო ფეხბურთელებმა არა 12, არამედ 13 ოქროს ბურთი მოიგეს, რაც “ბლაუგრანას” ერთპიროვნულად პირველ ადგილზე აყენებს, თანაც დიდი უპირატესობით.