ბარსელონამ, შესაძლოა, ფრენკი დე იონგი ამერიკული ტურის განაცხადს მიღმა დატოვოს

ფერან კორეასის ინფორმაციით, “ბარსელონამ” ფრენკი დე იონგს უთხრა, რომ “მანჩესტერ იუნაიტედის” შეთავაზება მიიღოს და გუნდი დატოვოს.

იმ შემთხვევაში, თუ ნიდერლანდელი წასვლაზე უარს იტყვის, შესაძლოა, კატალონიურმა კლუბმა იგი, პრესეზონის ფარგლებში გასამართი მომავალი მატჩებისთვის, ამერიკის შეერთებულ შტატებში არ წაიყვანოს.

“ბარსას” დე იონგის გაშვება სერჟი რობერტოს, ანდრეას კრისტენსენისა და ფრანკ კესიეს დასარეგისტრირებლად სჭირდება, უსმან დემბელესა და რაფინიას შემთხვევაში კი ესეც არ ყოფნის და სატელევიზიო უფლებების 15% უნდა გაყიდოს.

“ბარსელონა” დარწმუნებულია, რომ ფრენკის ტრანსფერი რამდენიმე დღეში შედგება, რადგან “მანჩესტერ იუნაიტედი” ჩქარობს. თანაც, კლუბში მიაჩნიათ, ამ შეთავაზებაზე უარის თქმა შეუძლებელია. საბოლოო სიტყვა ფეხბურთელს ეკუთვნის.

დე იონგმა ისიც იცის, რომ “ბარსას” შუახაზში 2 ადგილი ბუსკეტსსა და პედრის ექნებათ დაკავებული, დარჩენილი ერთი პოზიციისთვის კი მას ბრძოლა გავისთან, კესიესა და ნიკოსთან მოუწევს. კლუბმა ფრენკის სწორედ ამაზე მიუთითა და, აღნიშნული მდგომარეობის გათვალისწინებით, გადაწყვეტილება მან უნდა მიიღოს.