ოფიციალურად: ბარსელონას კლუბის წევრობა უკვე ელექტრონულად შეგიძლიათ

სიახლე, რომელსაც “ბარსელონას” გულშემატკივრები მთელი მსოფლიოდან ელოდნენ. ამიერიდან “ბარსელონას” ნებისმიერ გულშემატკივარს შეუძლია, კლუბის წევრი დისტანციურად, ონლაინ ფორმის შევსებით გახდეს.

2021 წლის ივლისამდე “ბარსელონაში” გაწევრიანება შეეძლოთ მხოლოდ 14 წლამდე პირებს, ან პირებს, რომელთა პირველი ან მეორე ხარისხის ნათესავი კლუბის წევრი იყო, ან პირებს, რომლებიც 3 წლის განმავლობაში ფლობდნენ ფანკლუბის (მათ შორის ჩვენი, ბარსამანიას ფანკლუბის) წევრობის ბარათს ან Commitmend Card-ს. ეს შეზღუდვები სანდრო როსელისა და ჟოზეპ-მარია ბართომეუს მმართველობის დროს დაწესდა.

წინა ზაფხულში “ბარსამ” ეს შეზღუდვები მოხსნა, მაგრამ კლუბის წესდების თანახმად აუცილებელი იყო, რომ წევრობის მსურველი “კამპ ნოუს” ოფისში მისულიყო. გასული წლის ოქტომბერში გამართულ გენერალურ ასამბლეაზე წესდების ეს ნაწილი შეიცვალა და შესაძლებელი გახდა, გულშემატკივარი კლუბის წევრი ელექტრონულადაც გამხდარიყო. რამდენიმე თვის განმავლობაში ჩატარებული ტექნიკური სამუშაოების შემდეგ კი “ბარსელონამ” სიახლე საბოლოოდ დანერგა.

“ბარსელონას” წევრობის ღირებულება

კლუბის წევრობის ერთი წლის საფასური 5 წლამდე პირებისთვის არის 46 ევრო, 6-დან 14 წლამდე პირებისთვის 97 ევრო (წელს, ვინაიდან წელი უკვე დაწყებულია, 73 ევრო), ხოლო 14 წელზე უფროსი პირებისთვის 195 ევრო (წელს, ვინაიდან წელი უკვე დაწყებულია, 146 ევრო).

როგორ გავწევრიანდეთ?

გასაწევრიანებლად ონლაინ ფორმის შევსება ამ გვერდზე შეგიძლიათ.

რატომ გავწევრიანდეთ?

წევრობის საფასური ქართული რეალობისთვის საკმაოდ მაღალია და მის სანაცვლოდ კლუბმა შესაბამისი სარგებელიც უნდა შემოგვთავაზოს. “ბარსელონას” წევრობა მოიცავს შემდეგს:

• გაწევრიანებიდან ერთი წლის შემდეგ კლუბის გენერალურ ასამბლეაში მონაწილეობის მიღების უფლებას;
• გაწევრიანებიდან ერთი წლის შემდეგ კლუბის საპრეზიდენტო არჩევნებში ხმის მიცემის უფლებას;
• “ბარსელონას” წევრობის დამადასტურებელ ბარათს;
• ფასდაკლებებს “კამპ ნოუს” ბილეთებზე;
• მაღალი მოთხოვნის თამაშებზე (მაგალითად “ელ კლასიკოზე”) ბილეთების წინასწარ გაყიდვაში მონაწილეობის მიღების უფლებას;
• ფასდაკლებებს “ბარსელონას” მუზეუმის ტურზე;
• ფასდაკლებებს “ბარსელონას” ოფიციალურ მაღაზიაში როგორც ადგილზე, ასევე ონლაინ შესყიდვის დროს;
• “ბარსელონას” გასვლით თამაშებზე დასწრების შესაძლებლობას;
• Barca TV+ უფასოდ.

იგეგმება, რომ მალე კლუბის წევრებს Spotify-ს პრემიუმზე ფასდაკლებებიც ექნებათ.

მთავარი სარგებელი კი ალბათ მაინც ისაა, რომ “ბარსელონას” მესაკუთრეები კლუბის წევრები არიან და კლუბთან დაკავშირებულ მნიშვნელოვან გადაწყვეტილებებს სწორედ ისინი იღებენ. ამიერიდან ამის საშუალება საქართველოდანაც გვეძლევა.