ქალთა ფეხბურთი – ყველა ბილეთი 24 საათში გაიყიდა

ის, რასაც “ბარსელონას” ქალთა ფეხბურთის მიმართულება აკეთებს, წარმოუდგენელია. ქალების გუნდი აჩვენებს შედეგებს, რომლებიც კაცების ფეხბურთისთვისაც კი უცხოა. საუბარი არა საფეხბურთო შედეგებზე, არამედ სტადიონის შევსებაზეა.

მიმდინარე სეზონში “კამპ ნოუზე” ქალების “ელ კლასიკოს” უფრო მეტი ადამიანი დაესწრო, ვიდრე კაცების “ელ კლასიკოს”. მეტიც, დიდი ხანია, ევროპულ ფეხბურთს მოედანზე იმდენი გულშემატკივარი არ უნახავს, რამდენიც “ბარსელონასა” და “რეალის” ქალების გუნდების დაპირისპირების დროს “კამპ ნოუზე” ნახა.

ამ თამაშიდან ერთ კვირაში “ბარსელონამ” ქალების ჩემპიონთა ლიგის 1/2 ფინალში “ვოლფსბურგთან” გასამართი ბილეთების გაყიდვა დაიწყო. გუშინ ბილეთების მოთხოვნის უფლება მხოლოდ კლუბის წევრებს ჰქონდათ, დღეს კი ეს უფლება ყველამ მიიღო, მაგრამ მხოლოდ რამდენიმე საათით. ბილეთების გამოტანიდან დაახლოებით 24 საათში ყველა გაიყიდა. საუბარი თითქმის 100 ათას ბილეთზე გვაქვს.