აბიდალის საქმის ახალი დეტალი – ღვიძლის დონორი ნათესავი არაა

ერიკ აბიდალის ღვიძლის გადანერგვის ოფიციალური ვერსია სერიოზული კითხვის ნიშნის ქვეშ დგას. ამის მიზეზი ესპანეთის ტოქსიკოლოგიის ეროვნული მუზეუმის დასკვნაა.

ერიკ აბიდალს ღვიძლი 2012 წელს, “ბარსელონაში” თამაშის დროს გადაუნერგეს. ოფიციალური ვერსიით დონორი მისი ბიძაშვილი ჟერარი იყო.

პრობლემები კი 2017 წელს დაიწყო, როდესაც პოლიციამ “ბარსელონას” ყოფილი პრეზიდენტის, სანდრო როსელისა და კლუბის თანამშრომლის, ხუანხო კასტილიოს საუბარი მოისმინა. ამ საუბრიდან ირკვევა, რომ აბიდალისთვის გადასანერგი ღვიძლი უკანონო გზებით შეიძინეს და დონორი სინამდვილეში ბიძაშვილი არ ყოფილა.

გამოძიება მალევე დაიწყო. ახლახან კი ტოქსიკოლოგიის ინსტიტუტის დასკვნა გახდა ცნობილი. TV3-ის ცნობით, ირკვევა, რომ აბიდალის ღვიძლის დონორი მისი ნათესავი არაა. გამოკვლევები ამით არ დასრულებულა, მომავალში უფრო მეტი ნიმუშის შესწავლა იგეგმება და ზუსტი დასკვნაც ამის შემდეგ დაიდება.

ამ ინფორმაციის გავრცელების შემდეგ ერიკ აბიდალის ადვოკატი კარლეს მონგილოდი კვლავ ამტკიცებს, რომ ღვიძლის გადანერგვა კანონის ყველა მოთხოვნის დაცვით მოხდა. ის ასევე აცხადებს, რომ როსელისა და კასტილიოს საუბარი მოგონილია. თავად ხუანხო კასტილიამ სასამართლოზე განაცხადა, რომ როსელთან საუბრის დროს ის უბრალოდ ხუმრობდა და რომ მას ამბების მოგონება და გაზვიადება სჩვევია. სანდრო როსელის ადვოკატი კი ამტკიცებს, რომ მის კლიენტს გადანერგვის პროცესთან კავშირი საერთოდ არ ჰქონია.