435 მილიონი Spotify-სგან – უდიდესი სასპონსორო გარიგება ფეხბურთის ისტორიაში

ზეგ, 3 აპრილს “ბარსელონას” ასამბლეა გაიმართება, რომლის დროსაც დელეგატებმა Spotify-სთან მიღწეული შეთანხმება უნდა დაადასტურონ.

ეს ასამბლეა ისტორიულია ორი მიზეზით. პირველი ისაა, რომ ის ელექტრონულად ტარდება. მეორე მიზეზი კი ისაა, რომ ისტორიაში პირველად “ბარსელონას” სტადიონის სახელის სპონსორისთვის მიქირავების საკითხი განიხილება.

მხარეებს შორის არსებული კონფიდენციალურობის შეთანხმების გამო “ბარსელონა” გარიგების პირობებს ოფიციალურად ვერ ახმაურებს, მაგრამ Sport-ის მტკიცებით მისმა ჟურნალისტებმა ზუსტი რიცხვები მოიპოვეს.

მომდევნო 4 წლის განმავლობაში “ბარსელონას” კაცებისა და ქალების გუნდების მაისურებზე Spotify-ს რეკლამა იქნება გამოსახული, რაშიც შვედური კომპანია წელიწადში 57.5 მილიონ ფიქსირებულ თანხას, ხოლო 2.5 მილიონ ძალიან მარტივად მისაღწევ ბონუსებს გადაიხდის. 4 წელიწადში ეს 240 მილიონ ევროს უდრის.

მომდევნო 3 წლის განმავლობაში Spotify ასევე იქნება კაცებისა და ქალების სავარჯიშო ფორმების სპონსორიც, რაშიც წელიწადში 5 მილიონს, სულ კი 15 მილიონ ევროს გადაიხდის.

მაისურების სპონსორობის ჯამი 255 მილიონია.

სტადიონის სახელის სპონსორობა (Spotify Camp Nou) ორ ნაწილად იქნება დაყოფილი. პირველი 4 წლის განმავლობაში, როდესაც “კამპ ნოუ” რეკონსტრუქციაზე იქნება, შვედური კომპანია წელიწადში 5 მილიონს გადაიხდის, ანუ სულ 20 მილიონს. Espai Barca-ს პროექტის განხორციელების შემდეგ ძალაში ახალი პირობები შევა, რომლებიც მომდევნო 8 წლის განმავლობაში იქნება მოქმედი. ამ პირობების თანახმად “ბარსა” წლიურად 20 მილიონს მიიღებს, სულ 160 მილიონს, რასაც წინა 4 წლის 20 მილიონი დაემატება და გამოვა, რომ “ბლაუგრანა” სტადიონის სახელის გაქირავებიდან 180 მილიონ ევროს გამოიმუშავებს.

სულ “ბარსელონა” Spotify-სგან 435 მილიონ ევროს მიიღებს, რაც ფეხბურთის ისტორიაში უდიდესი სასპონსორო გარიგებაა.