ალემანის მასტერკლასი – ფერან ტორესის ტრანსფერის ყველა დეტალი

ფერან ტორესი რომ უახლოეს მომავალში “ბარსელონას” ფეხბურთელი გახდება, ამაში ეჭვი აღარავის ეპარება. კატალონიელები “მანჩესტერ სიტის” 55 მილიონ ევროს გადაუხდიან და შესაძლოა, თანხა 65 მილიონამდეც კი გაიზარდოს.

“ბარსელონას” ფინანსური მდგომარეობის გათვალისწინებით ფეხბურთელში 65 მილიონი ევროს გადახდა კარგი აზრი ნამდვილად არ მოჩანს, მაგრამ თუ ტრანსფერს დეტალურად შევისწავლით, დავრწმუნდებით, რომ “ბლაუგრანას” სპორტულმა დირექტორმა, მატეუ ალემანიმ ნამდვილად ძალიან კარგად იმუშავა.

საწყისი ვითარება ასეთი იყო – “მანჩესტერ სიტი” 75 მილიონს ითხოვდა, “ბარსელონა” კი მხოლოდ 45 მილიონის გადახდაზე იყო თანახმა. საბოლოოდ მხარეები 55+10 მილიონზე შეთანხმდნენ, რაც მათ მოთხოვნების დაახლოებით შუალედური ვარიანტია.

Marca გარიგების დეტალებს ასაჯაროებს. როგორც ირკვევა, “ბარსას” ზამთარში არაფრის გადახდა არ მოუწევს. კატალონიელები 55 მილიონს 4 ნაწილად გადაიხდიან, პირველ ნაწილს კი 2022 წლის ზაფხულში დაფარავენ.

რაც შეეხება დამატებით 10 მილიონს – მისი გადახდა 4 პირობაზეა დამყარებული და ოთხივე მათგანი “ბარსასთვის” მომგებიანია. ბონუსების პირველი პირობა გულისხმობს, რომ “ბარსელონამ” ჩემპიონთა ლიგა უნდა მოიგოს, ტორესმა კი შეხვედრების 70%-ში 45 წუთი ან მეტი ითამაშოს. მეორე და მესამე პირობა გულისხმობს, რომ ფერან ტორესმა “ოქროს ბურთი” ან “ოქროს ბუცი” უნდა მოიგოს. დასკვნითი პირობა კი “ბარსელონას” მიერ ფერან ტორესის 100 მილიონ ევროზე ძვირად გაყიდვაა. გამოდის, რომ თუ “ბარსას” დამატებით 10 მილიონის გადახდა მოუწევს, ესე იგი, ტრანსფერი ძალიან წარმატებული ყოფილა.

თუ Marca-ს მიერ გავრცელებული ინფორმაცია სიმართლეა, მაშინ მატეუ ალემანისა და მის გუნდს ნამდვილად შექება ეკუთვნით.