პიკე ბარსას ყველაზე ასაკოვანი მოთამაშეა, რომელმაც ჩემპიონთა ლიგაზე გაიტანა

“ბარსელონამ” დღეს “კამპ ნოუზე” კიევის “დინამო”, მინიმალური ანგარიშით, 1-0 დაამარცხა და ჩემპიონთა ლიგის ჯგუფიდან გასვლის შანსები შეინარჩუნა.

ანგარიში 36-ე წუთზე კატალონიელთა ცენტრალურმა მცველმა, ჟერარ პიკემ გახსნა. 34 წლისა და 260 დღის პიკე “ბარსელონას” ყველაზე ასაკოვანი მოთამაშე გახდა, რომელმაც ჩემპიონთა ლიგაზე გოლის გატანა შეძლო. მან ამ მაჩვენებლით “ბლაუგრანას” ყოფილი მცველი, სილვინიო ჩამოიტოვა, რომელმაც 2008 წელს, დონეცკის “შახტარს”, 34 წლისა და 241 დღის ასაკში გოლი გაუტანა.

აღსანიშნავია, რომ პიკემ კიევის “დინამოს” ზედიზედ მეორედ გაუტანა. 2020 წლის 4 ნოემბერს, ასევე ჩემპიონთა ლიგის მესამე ტურის მატჩში, ის ასევე გამარჯვების გოლის ავტორი გახდა.