ფასები განახლდა: დე იონგი ყველაზე ძვირადღირებულია, გავისა და აზარს ერთი ფასი აქვთ

ფეხბურთელების ღირებულების დამდგენმა ყველაზე ცნობილმა ვებგვერდმა, Transfermarkt-მა ლა ლიგის მოთამაშეთა ფასები განაახლა.

ცვლილებებია რეიტინგის სათავეში – ფრენკი დე იონგი ერთპიროვნულად ყველაზე ძვირადღირებული ფეხბურთელია. მისმა ფასმა, რომელიც 10 მილიონით გაიზარდა, 90 მილიონი ევრო შეადგინა. მეორე-მესამე ადგილებს მარკოს ლიორენტე და 18 წლის პედრი ინაწილებენ.

პედრიმ გაასწრო ანსუ ფატის, რომლის ღირებულებაც, ხანგრძლივი ტრავმის გამო, 20 მილიონით, 60 მილიონ ევრომდე შემცირდა. თუმცა ის გუნდის ყველაზე ძვირადღირებული ფეხბურთელების სამეულში მაინც რჩება.

“ბარსელონაში” ყველაზე მეტად გავის ფასმა მოიმატა. 17 წლის ფეხბურთელი, რომელიც აქამდე საერთოდ არ იყო შეფასებული, ახლა 25 მილიონად შეფასდა. საინტერესოა, რომ ამდენივე ღირს “რეალის” ბელგიელი ვარსკვლავი ედენ აზარი. ასევე აღსანიშნავია, რომ გავი ფილიპე კოუტინიოზე 5 მილიონით ძვირი ღირს – ბრაზილიელის ფასი კიდევ 10 მილიონით შემცირდა.

ფატისა და კოუტინიოს გარდა ფასი შეუმცირდათ ლანგლეს, ტერ შტეგენს, ალბას, რობერტოს, აგუეროს, პუჩს, უმტიტის, პიკეს, ლუკ დე იონგს, ნეტუს, კოლიადოსა და ბუსკეტსს. ფასი გაეზარდათ გავის, ფრენკი დე იონგს, პედრის, ნიკოს, მინგესას, დესტს, ბალდეს, დემირსა და პენიას, ხოლო დეპაის, გარსიას, დემბელეს, ვაგეს, ბრეითუეიტისა და არაუხოს ღირებულება უცვლელი დარჩა.

პროცენტულად ყველაზე დიდი სხვაობა ნიკო გონსალესის ფასმა დააფიქსირა – 1500%-იანი მატება. ნიკო მხოლოდ ნახევარ მილიონად იყო შეფასებული, ახლა კი 8 მილიონად ფასდება. 900%-ით გაიზარდა ალექს ბალდეს ფასი, რომელიც ასევე ნახევარი მილიონი ღირდა, ახლა კი 5 მილიონი ღირს.