ბარსელონას სავარაუდო შემადგენლობა ბენფიკასთან თამაშისთვის

ესპანეთის ჩემპიონატში “ლევანტეს” ძლევისა და ხასიათის გამოკეთების შემდეგ ჩემპიონთა ლიგის ჯერია. “ბარსელონას” წინ მნიშვნელოვანი თამაში ელის, ვაი რომ უშალო კონკურენტ “ბენფიკასთან”.

პირველმა ტურმა გვიჩვენა, რომ რონალდ კუმანის გუნდისთვის ჯგუფში პირველი ადგილი მიუღწეველი იქნება. რჩება 2 გუნდი, რომლებთანაც “ბარსამ” მე-2 პოზიციისთვის უნდა იბრძოლოს – “ბენფიკა” და კიევის “დინამო”. ამ სამეულში ფავორიტი, რა თქმა უნდა, “ბლაუგრანაა”, მაგრამ ესპანელებს ამ სტატუსის დამტკიცება მართებთ.

მეორე ტურში “ბარსა” სწორედ “ბენფიკას” ეწვევა და კატალონიური Sport ამ შეხვედრისთვის სტუმართა სავარაუდო თერთმეტეულს გვთავაზობს.

ვიცით, რომ “ბარსელონას” ისევ ვერ დაეხმარებიან დემბელე, აგუერო, ბალდე და ბრეითუეიტი. გუნდს უბრუნდებიან ფრენკი დე იონგი და სერჟი რობერტო. დიდი ალბათობით, მწყობრში იქნებიან პედრი და ჟორდი ალბაც, რომლებმაც გუნდთან ერთად ვარჯიში განაახლეს.

კარში, რა თქმა უნდა, ტერ შტეგენს ვიხილავთ.

მიუხედავად იმისა, რომ დიდი ალბათობით ალბა გამოჯანმრთელებას მოასწრებს, დაცვის ფლანგებზე ალბათ ისევ ოსკარ მინგესასა და სერჟინიო დესტს ვიხილავთ. დაცვის ცენტრში ისევ იქნება პიკე, ხოლო ერიკ გარსიას რონალდ არაუხო ჩაანაცვლებს.

ნახევარდაცვის ტრიოდან 2 ადგილი გარკვეულია – სერხიო ბუსკეტსსა და ფრენკი დე იონგს კონკურენციას ვერავინ გაუწევს. სრულად ჯანმრთელი რომ იყოს, მათ შეურთდებოდა პედრი, მაგრამ შესაძლოა, კუმანმა არ გარისკოს და მას სათამაშო დრო მე-2 ტაიმში მისცეს. სასტარტოსთვის კი გავი და რობერტო იბრძოლებენ, Sport-ის ვერსიით მეტი შანსი გავის აქვს, რომელმაც “ლევანტესთნ” კარგი თამაში გვიჩვენა.

შეტევაში ადგილი გარანტირებული მხოლოდ მემფის დეპაის აქვს. სავარაუდოდ, მას შეუერთდება ლუკ დე იონგი. მთავარი კითხვა კი მესამე შემტევის ვინაობაა. კანდიდატები ფილიპე კოუტინიო და იუსუფ დემირი არიან. Sport-ის აზრით უფრო მეტი შანსი დემირს აქვს.

რაც შეეხება ანსუ ფატის, მის მოედანზე გამოჩენას ისევ მეორე ტაიმში ველით, მაგრამ ამჯერად უფრო ადრე.

“ბენფიკასა” და “ბარსელონას” დაპირისპირება ზეგ, 29 სექტემბერს, 23:00 საათზე გაიმართება და პირდაპირ რეპორტაჟს სილქ სპორტ 3 შემოგვთავაზებს.