ბარსელონამ პრატთან მოსამზადებელი მატჩი გამართა

დღეს, “სიუტატ ესპორტივაზე” “ბარსელონამ”, “პრატის” წინააღმდეგ, მოსამზადებელი მატჩი გამართა, რომელიც მასპინძელთა გამარჯვებით 2-1 დასრულდა, იტყობინება Cadena SER.

ცნობის თანახმად, “ბარსელონას” მხრიდან შეხვედრაში მონაწილეობა პირველი გუნდის იმ ფეხბურთელებთან ერთად, რომლებიც ნაკრებებში გამოძახებულნი არ არიან, სარეზერვო გუნდის წევრებმაც მიიღეს. Sport წერს, რომ “ბარსამ” 4-3-3 სისტემით ითამაშა. ძირითად შემადგენლობაში შემდეგი ფეხბურთელები იმყოფებოდნენ: ტერ შტეგენი, მინგესა, კომასი, უმტიტი, ბალდე, პუჩი, პედრი, რობერტო, კოლიადო, ლ. დე იონგი და კოუტინიო.

პირველი გოლის ავტორი როჯერ ესკორუელა გახდა, რომელმაც ბურთი საკუთარ კარში ჩაჭრა. მეორე გოლი ახლადგამოჯანმრთელებულმა ფილიპე კოუტინიომ გაიტანა, მან მოედანზე, დაახლოებით, 60 წუთი დაჰყო.

არ უთამაშია ანსუ ფატის. როგორც კუმანმა განაცხადა, 18 წლის ფეხბურთელის რეაბილიტაციის პროცესში გარისკვას არ აპირებს. მას 14 სექტემბერს, “ბაიერნთან” მატჩშიც ვერ ვიხილავთ.

“პრატი” ესპანეთის რანგით მესამე დივიზიონში ასპარეზობს.