“ბარსელონას” ხელმძღვანელები მეკარის დამატებაზე მსჯელობენ

კატალონიური Sport-ის ინფორმაციით, “ბარსელონას” ხელმძღვანელები გუნდისთვის მეორე მეკარის შერჩევაზე მსჯელობენ. 

თითქმის გადაწყვეტილია, რომ 31 წლის ბრაზილიელი ფეხბურთელი, ნეტუ, რომელიც “ბარსას” 2019 წელს “ვალენსიადან” შეუერთდა, ზაფხულში კლუბიდან წავა. კლუბს მისი ჩანაცვლების ორი ვარიანტი აქვს: სხვა მეკარის შეძენა ან სარეზერვო გუნდის რომელიმე მოთამაშის იმედზე ყოფნა. მომხრეები ორივე მოსაზრებას ჰყავს. 

“ბარსელონას” ახალგაზრდულ გუნდში შემდეგი მეკარეები თამაშობენ: ინიაკი პენია, რომელიც პირველი გუნდის განაცხადში პირველად ჯერ კიდევ 2018 წელს მოხვდა, თუმცა მოედანზე არ გასულა, არნაუ ტენასი და ლაზარ ცარევიჩი. 

რაც შეეხება პოტენციურ ტრანსფერს – პრესაში ყველაზე ხშირად ჯანლუიჯი დონარუმაზე იწერება. 22 წლის იტალიელის “მილანიდან” წასვლა უკვე დადასტურებულია.