რონალდ კუმანის დარჩენა “ბარსელონას” ტრანსფერებს აჩქარებს

მას შემდეგ, რაც დადასტურდა, რომ “ბარსელონა” მომდევნო სეზონს ისევ რონალდ კუმანის ხელმძღვანელობით დაიწყებს, გუნდის ბევრი წევრის მომავალთან დაკავშირებით კითხვის ნიშნები მოიხსნა. 

კუმანს კონკრეტული გეგმა აქვს, კლუბი კი ეცდება, რომ ის მოთამაშეები, რომლებიც ამ გეგმაში არ შედიან, რაც შეიძლება მალე გაყიდოს. ამ ფეხბურთელებზე TV3-ის ჟურნალისტი ფრანსესკ ლატორე წერს. 

ჟუნიორ ფირპო, ნეტუ, მატეუსი და სამუელ უმტიტი “ბარსას” მთავარ მწვრთნელს აღარ სჭირდება. ამ მოთამაშეებს შორის ყველაზე რთულად საქმე ფრანგ მცველთანაა: უმტიტი წასვლას არ ჩქარობს, მასთან მოლაპარაკება ვერ ხდება, იმ პირობებში კი, როცა მოედანზე პრაქტიკულად არ გადის, კლუბისგან სეზონში 13 მილიონ ევროს იღებს. 

“ბარსელონას” ასევე სურს, რომ კლუბი ფილიპე კოუტინიომ დატოვოს. ბრაზილიელი უკვე დიდი ხანია ტრავმირებულია და მისი “ბარსაში” დიდხანს დარჩენა კლუბს ფინანსურად აზარალებს. 

კუმანის დარჩენა ცუდი სიახლეა მირალემ პიანიჩისა და რიკი პუჩისთვისაც. ბოსნიელი ნახევარმცველი, შესაძლოა, იტალიაში დაბრუნდეს, პუჩის გარემოცვა კი სიტუაციაზე კომენტარს არ აკეთებს. ბორდის დიდ ნაწილს ამ უკანასკნელი დაკარგვა არ სურს. 

უსმან დემბელესა და ანტუან გრიზმანის მდგომარეობა ბოლომდე გარკვეული არ არის. ისინი გასაყიდ ფეხბურთელთა სიას არ მიეკუთვნებიან, თუმცა სერხიო აგუეროსა და მემფის დეპაის მოსვლამ შეიძლება კლუბს მათდამი დამოკიდებულება შეაცვლევინოს. 

მოლაპარაკება გაგრძელდება “ბარსას” “მძიმეწონიან” ფეხბურთელებთან. ხელმძღვანელები პიკეს, ბუსკეტსს, ალბასა და რობერტოს ხელფასის შემცირებას შესთავაზებენ, უარის შემთხვევაში კი ტრანსფერებზე ფიქრს დაიწყებენ.